उदयपुर । अविरल वर्षाले कटारीको जनजीवन प्रभावित भएको छ । वर्षापछि आएको बाढीले कटारी नगरपालिका ७ रिस्कुस्थित बैजनाथ खोलामा आएको बाढीले एउटा ट्रक बगाएको छ । सोमबारेबाट रिस्कूतर्फ हिँडेको बागमती प्रदेश ००३००१ ख २०६१ नम्बरको ट्रक बगाएको हो ।

बाढी आएपछि खोला किनारमा रहेको खाली ट्रक बगाएको स्थानीयले बताएका छन् । रिस्कुतर्फ काठ लिन हिँडेको खाली ट्रक खोलाले बगाएको हो ।त्यसैगरी वर्षाकाले कटारी ४ को बजार क्षेत्र डुबानमा परेको छ । बजारसँगै सिद्धिचरण लोकमार्गको सडक नै डुबानमा पर्दा आउजाउमा समेत समस्या भएको छ । स्थानीयले घर नै भत्काएर लैजान लागेको बताउँदै नगरमा गुनासो गरेका थिए ।

दिगो ढलनाला व्यवस्थापन नहुँदा वर्षादमा कटारी बजारका पसल तथा घर डुबानमा पर्ने गरेका छन् । डुबानले जनजीवन प्रभावित भएपछि स्थानीय आक्रोशित भएका छन् । कटारीका जनप्रतिनिधिले समस्या समाधानमा चासो नदिएको बताउँदै उनी नगरपालिका पुगेका थिए ।