काठमाडौँ । धनुषाका जिल्ला न्यायाधीश डा. परशुराम भट्टराई सर्वोच्च अदालतमा सरुवा भएका छन् । उनलाई सर्वोच्चले काजमा सरुवा गरेको हो ।

न्याय परिषदको बैठकमा भएको छलफलपछि कायम मुकायम प्रधानन्यायाधीश दीपककुमार कार्कीले उनलाई सर्वोच्चमा तानेका हुन् ।

धनुषाका जिल्ला न्यायाधीश भट्टराईले तत्कालीन समयमा निहारिका राजपुतसँग सम्बन्धित मुद्दाको फैसला गरेका थिए । सोही फैसलापछि राजपुतले आफूमाथि बलात्कार भएको बताउँदै न्यायको माग गर्दै आएकी छन् ।

राजपुतले केही दिनअघि मात्रै राष्ट्रपति भवन शितल निवासअगाडि आत्मदाहको प्रयास गरेकी थिइन् । घटनाको भोलिपल्ट राष्ट्रपति विद्यादेवी भण्डारीले कानूनमन्त्री गोविन्द बन्दी र महान्यायाधीवक्ता खम्मबहादुर खातीसँग छलफल गरेकी थिइन् ।

स्रोतका अनुसार न्यायाधीश भट्टराईमाथि छानबिन गर्न परिषदका सदस्य एवं वरिष्ठ अधिवक्ता रामप्रसाद श्रेष्ठको संयोजकत्वमा समिति गठनसमेत भएको छ ।