काठमाडौँ । पाकिस्तानको बालुचिस्तानमा वर्षाका कारण थप आठ जनाको मृत्यु भएको छ । योसँगै पछिल्लो प्राकृतिक प्रकोपमा परी पाकिस्तानमा मृत्यु हुनेका संख्या १९६ पुगेको छ ।

मृत्यु हुनेमध्ये ९६ जना पुरुष रहेका छन् भने ४५ जना महिला छन् । त्यसैगरी ५५ जना बालबालिकाको मृत्यु भएको जनाइएको छ ।

वर्षाले बालुचिस्तानका धेरै ठाउँमा आएको बाढी पहिरोले मानवीय र भौतिक क्षति गरेको छ । बाढी पहिरोले पछिल्लो तीन दिनमा ८१ जना घाइते भएका छन् । उनीहरूको विभिन्न अस्पतालमा उपचार भइरहेको अधिकारीले जनाएका छन् ।

प्राकृतिक प्रकोपमा परी एक लाख सात हजार ३७७ पशु चौपायासमेत परेको प्रान्तीय प्रकोप व्यवस्थापन प्राधिकरणले जनाएको छ । बलुचिस्तानको बोलान, क्वेटा, झोव, डाक्की, खुज्डर, कोलु, केच, मस्तुङ, हर्नाइ, क्विला साइफुल्लाह र सिब्बीमा बाढी पहिरोले मानवीय क्षति गरेको हो ।

बाढी पहिरोले सडक यातायात सेवा, विद्युत, सञ्चारलगायतका सेवा प्रभावित भएका छन् । ती सेवा सुरु गर्न प्रयास भइरहेको अधिकारीको भनाइ छ ।

बाढी पहिरोले मानिस बस्ने घरमा ठूलो क्षति पुगेको छ । क्षतिग्रस्त घरका बासिन्दा विस्थापित भएका छन् । उनीहरूलाई अस्थायी शिविरमा राखिएको छ ।

स्थानीय एक अधिकारीका अनुसार क्विला साइफल्लाहमा मात्रै झण्डै १२० घर क्षतिग्रस्त भएको पाइएको छ । त्यसैगरी अन्य ठाउँमा अरु दुई सय घर क्षतिग्रस्त भएको अधिकारीले जनाएका छन् ।