काठमाडौँ । एमाले सांसद प्रदीप ज्ञवालीले राष्ट्रपति विद्यादेवी भण्डारीले नागरिकता विधेयक पुनर्विचार गर्नका लागि संसद्‍मा फिर्ता गरेर सर्वस्वीकार्य बनाउने अवसर दिएको बताएका छन् । राष्ट्रपतिले दिएको त्यो अवसरलाई सदुपयोग गर्नुपर्ने र सांसदहरूको टाउको गणना गरेर टुंगो लगाउन नहुने ज्ञवालीको भनाइ थियो ।

राष्ट्रपति भण्डारीले नागरिकता विधेयक फिर्ता गर्ने क्रममा पठाएको सन्देश र नागरिकता विधेयकमाथि प्रतिनिधिसभामा बिहीबार सांसद ज्ञवालीले उक्त कुरा बताएका हुन् ।

‘राष्ट्रपतिले आमाको गरिमा, प्रादेशिक पहिचान या अन्य यावत प्रश्नहरूलाई एकमुष्ट समाधान गरेर नागरिकता विधेयकलाई सर्वस्वीकार्य दस्तावेज बनाइयोस् भनेर अवसर दिनुभएको हो,’ उनले भने, ‘यो टाउको गणनाबाट टुंग्याउने विषय होइन । समाज विभाजित भयो भने दुष्परिणाम पछिसम्म रहने छ ।’

नागरिकता विधेयक मधेसी समुदायसँग मात्रै जोडिएको विषय नभएको बताउँदै ज्ञवालीले भने, ‘यो दस्तावेज सिंगो राष्ट्रलाई प्रतिनिधित्व गर्ने, सबै भेग, सबै समुदाय र सबै जनताको समस्यासँग जोडिएको प्रश्न हो । यो राष्ट्रिय एकता हासिल गर्ने दस्तावेज पनि हो । यो केवल मधेसको या कुनै समुदाय विशेषको विषय होइन । तथ्यहरूले पनि त्यै बताउँछन् ।’

निश्चित समुदायसँग जोडेर नागरिकता विधेयकलाई राजनीतिकरण गरिएको ज्ञवालीको भनाइ थियो । उनले भने, ‘यसलाई समुदायको विषय बनाएर राजनीतिकरण गर्ने, कुनै दल त्यो समुदायको हिमायती र कुनै दल समुदायविरोधी बनाउने कुरा गर्न भएन । जनमत विभाजित किमार्थ गरिनु हुँदैन ।’

नागरिकता विधेयक छिटो टुंगो लगाउन प्रमुख प्रतिपक्ष तयार रहेको ज्ञवालीको भनाइ थियो । तर सत्तापक्षले जबर्जस्ती गर्न नहुने उनले बताए । ‘नागरिकता विधेयक छिटो टुंग्याउन प्रतिपक्ष रचनात्मक ढंगले सहयोग गर्न तयार छ । तर यसलाई जबर्जस्ती, टाउकाको गिन्तीको आधारमा गर्नुभयो भने यसका दुष्परिणाम राम्रो हुँदैनन्, उनले भने ।

नागरिकता विधेयक जस्ताको तस्तै पारित गरेर राष्ट्रपतिकहाँ फिर्ता पठाउने सत्ता गठबन्धनको निर्णयले संसदीय व्यवस्थाको खिल्ली उडाएको ज्ञवालीको भनाइ थियो ।