काठमाडौँ । सत्ता गठबन्धन दलको बैठक सकिएको छ । सोमबार दिउँसो प्रधानमन्त्री निवास बालुवाटारमा बसेको बैठकमा संघ र प्रदेशसभा निर्वाचनबारे छलफल भएको छ ।

संघ र प्रदेशसभा निर्वाचनका लागि सिट बाँडफाँट गर्न गठित कार्यदलले भागबण्डा लगाउन नसकेपछि गठबन्धनका शीर्ष नेताहरू छलफलमा जुटेका हुन् । आजको बैठकमा दलहरूले आफ्ना अपेक्षा र मापदण्डबारे कुरा गरेको तर ठोस विषयमा छलफल हुन नसकेको बताइएको छ ।

सरकारका प्रवक्तासमेत रहेका कांग्रेस नेता ज्ञानेन्द्रबहादुर कार्कीले बैठक निष्कर्ष नजिकमा पुगेको बताए । उनका अनुसार भोलि दिउँसो २ बजे पुनः बैठक बस्ने भएको छ । उनले सिट बाँडफाँट र त्यसपछिको अवस्थाबारे बैठक केन्द्रीत भएको जानकारी दिए ।

बैठकमा सत्ता गठबन्धनमा अन्य दललाई पनि समेट्नेबारे छलफल भएको उनले बताए ।