काठमाडौँ । प्रमुख प्रतिपक्ष दल नेकपा एमालेले प्रधानन्यायाधीश चोलेन्द्र शमशेर जबराबिरुद्धको महाभियोग प्रस्तावमाथि छलफल गर्न ढिलाइमाथि प्रश्न गरेको छ ।

मंगलबार सिंहदरबारमा बसेको महाभियोग सिफारिस समितिको बैठकमा बोल्दै एमालेका सांसद विष्णु पौडेलले महाभियोग प्रस्ताव दर्ता हुँदा सदन नचले १५ दिनभित्र सदन बोलाउनु पर्ने र सदन चले ३ दिनभित्र महाभियोग प्रस्तावमा छलफल गर्नु पर्ने व्यवस्थाको उल्लंघन भएको भन्दै विरोध जनाएका थिए । उनले महाभियोग प्रस्ताव दर्ता भएको ६ महिनासम्म छलफल नगर्नु गम्भिर विषय भएको बताए ।

उनले महाभियोग पारित गर्न ल्याइएको हो कि केवल प्रस्ताव दर्ता गरेर न्यायालयलाई प्रभावित पार्न खोजिएको हो ? भन्दै जवाफ माग गरेका थिए । छलफलमा ढिलाइ गर्नुका कारणबारे जवाफ नपाएसम्म सिफारिस समितिका सदस्यहरूले प्रभावकारी ढंगले काम गर्न नसक्ने उनको दाबी थियो ।

सांसद पौडेलले संघ र प्रदेश तहको निर्वाचनको मिति घोषणा भइसकेको र समितिलाई तीन महिनाका लागि समय दिएको उल्लेख गर्दै यस्तो परिस्थितिमा छानबिन गर्न कठिनाइ हुन सक्ने बताए । समितिको बैठक बुधबार दिउँसो २ बजे पुनः बस्ने भएको छ ।