काठमाडौँ । आज भाद्र कुशे औंसी पर्व । आज घरघरमा पवित्र कुश भित्र्याएर मनाइँदै छ ।

सनातन वैदिक हिन्दू धर्मावलम्बी वर्षभरि घरघरमा गरिने देवकार्य एवम् पितृकार्यका लागि आवश्यक पर्ने कुश आजै घरमा राखेर पूजा गर्ने गर्छन् ।

कुश घरमा राख्नाले परिवारको कल्याण हुने धार्मिक विश्वास छ । वैदिक सनातन हिन्दू धर्मावलम्बी कुश, तुलसी, पीपल र शालिग्रामलाई भगवान् विष्णुको स्वरूप मानी पूजा आजा गर्ने गर्छन् ।

यस्तै, आज बुवाको मुख हेर्ने दिनसमेत हो । आजकै छोराछोरीहरू आआफ्ना बाबुलाई मन पर्ने मिठाइ तथा भोजन गराई आदर सम्मान प्रकट गर्छन् । यसैले आजको दिनलाई ‘बाबुको मुख हेर्ने’ दिन र पितृ दिवससमेत भनिन्छ ।

आज विभिन्न धार्मिक स्थलमा बाबुका नाममा तर्पण र श्राद्ध गरी सिदा दानसमेत गर्ने गर्छन् ।