काठमाडौँ । मोरङको जहादा गाउँपालिका ३ मा रहेको जुडीखोलामा झोलुङ्गे पुल निर्माण हुँदा स्थानीय उत्साहित भएका छन् ।

प्रदेश सरकारको सडक पूर्वाधार तथा सहरी विकास मन्त्रालयको सहयोगमा जुडीखोलामा झोलुङ्गे पुल निर्माण हुँदा स्थानीय उत्साहित भएका हुन् । जहदा गाउँपालिका ३ चारैतिरबाट जुडीखोलाले घेरिएकाले पुल नहुँदा आवतजावत गर्न स्थानीयलाई समस्या हुने गरेको थियो ।

वडाध्यक्ष अनिलकुमार ठाकुरले वर्षायाममा नजिकैको टोलमा पुग्न घण्टौ हिँड्नु पर्ने समस्या अन्त भएको बताए । ‘खोला तर्न नसक्नेले आधा किलोमिटर बाटोको दुरी कायम गर्न करिब पाँच किलोमिटर धुमेर पुग्नु पर्ने बाध्यता थियो,’ वडाध्यक्ष ठाकुरले भने, ‘झोलुङ्गे पुलले सहज बनायो ।’

साँघुरो बाटो र खोलामा जोखिमपूर्ण यात्रा गर्नु पर्ने बाध्यतामा रहेका स्थानीयले झोलुङ्गे पुल बनेसँगै सहज आवत जावत गर्न बनेको छ । वडाकै वनटोली र जयरामपुरको बीचमा पर्ने जुडीखोलामा झोलुङ्गे पुल निर्माण हुँदा उत्साहित भएको स्थानीय ७३ वर्षीय सरुपलाल मलाहले बताए ।

झोलुङ्गे पुल बनेपछि आधा दर्जन बस्तीका करिब पाँच हजार व्यक्तिलाई आवत जावत गर्न सहज भएको उनको भनाइ थियो । स्थानीय नारायण कामतले खोला तर्नु पर्ने समस्याबाट मुक्ति पाएको बताए ।

कूल २५ मिटर झोलुङ्गे पुल ३६ लाख लागतमा निर्माण भएको अध्यक्ष ठाकुरले जानकारी दिए । निर्माण सम्पन्न भएपछि दुवै बस्तीसँगै भारत बिहारको सुनरीमण्ड सहित सिमावर्ती क्षेत्र डुमरिया, पोखरिया र लक्ष्मीनीयालगायतका बासिन्दालाई आवत जावत गर्न सहज भएको छ ।