ललितपुर । ललितपुरको कुपण्डोलमा रहेको खड्गी इन्स्टिच्युट अफ इन्डोयूरोलोजीले आरुस लाइफस्टाइल अस्पताल तथा रेडक्रस सोसाइटी अफ कुवेतसँगको सहकार्यमा मिर्गौला पत्थरी तथा प्रोस्टेट ग्रन्थीका बिरामीका लागि निःशुल्क शल्यक्रिया शिविर आयोजना गर्ने भएको छ ।

शुक्रबार पत्रकार सम्मेलन गरी आगामी पुस १४ देखि १६ गतेसम्म तीन दिन एकैपटक ४० जनाको मिर्गौला पत्थरी र प्रोस्टेट ग्रन्थीका विपन्न बिरामीको लागि निःशुल्क शिविर आयोजना गर्न लागिएको इन्स्टिच्युटका प्रबन्ध निर्देशक तथा कन्सल्टेन्ट युरोलोजिस्ट डा. संजय खड्गीले जानकारी दिए ।

उनले कसैले पनि उपचार सेवा नपाएर ज्यान गुमाउन नपरोस भनेर आर्थिक अवस्था कमजोर भएका बिरामीकै लागि निःशुल्क शल्यक्रिया शिविरको आयोजना गर्न लागिएको बताए । उनले भने, ‘पत्थरी शल्यक्रियाका लागि मिनी पीसीएनएल विधि र प्रोस्टेट ग्रन्थीका लागि बाइपोलार टर्भ विधिबाट बिरामीमा ठूलो चिरफार नगरी अत्याधुनिक प्रविधिबाट शल्यक्रिया गरिने छ ।’

शिविरबाट ४० जना विपन्न वर्गका बिरामीले निःशुल्क शल्यक्रिया सेवा पाउने छन् । खड्गी इन्स्टिच्युटले यसअघि पनि विपन्न वर्गका बिरामीका लागि निःशुल्क शल्यक्रिया गर्दै आएको छ । यस्तै, आफ्नो स्थापना कालदेखि हरेक महिना ४ जना विपन्न बिरामीको अत्यन्त कम शुल्कमा शल्यक्रिया गर्दै आएको छ ।

यो एक वर्षमा आफूहरुले एक हजार ४४० जना बिरामीको मेजर र माइनर गरी शल्यक्रिया गरेको र त्यसमध्ये २८ जनाको पूर्ण निःशुल्क र ७५ जनाको अत्यन्त कम शुल्कमा शल्यक्रिया सेवा दिएको जानकारी दिएका थिए ।