काठमाडौं । कपिलवस्तु जिल्ला अदालतका न्यायाधीश भुवन गिरीलाई पक्राउ गरी कारबाही प्रक्रिया अगाडि बढाउन माग गर्दै सर्वोच्च अदालतअगाडि विरोध प्रदर्शन गरिएको छ । मंगलबार उनकी श्रीमती आरती गिरी रावललगायत व्यक्तिले प्रदर्शन गरेका हुन् ।

प्रदर्शनमा सहभागी बिनु यादवले आफूहरू धेरैपटक न्याय परिषद्मा गए पनि मुदा नै दर्ता नगरेको र पीडितका कुरा सुनुवाइ नभएको जिकिर गरिन् ।

“न्यायाधीश भुवन गिरी हुनुहुन्छ, उहाँको श्रीमती हो, आरती गिरी । हामी धेरैपटक भइसक्यो, न्यायालय धाएको । तर, प्रक्रिया अघि बढाइदिनुभएको छैन । न्यायका लागि हामीले आत्मदाह गर्नुपर्ने हो ?,” उनले भनिन्, “हामी पीडितहरू अब सडकमा उत्रिएर आन्दोलन गर्नेछौँ । म काकाससुरा पर्नेबाट पटक–पटक बलात्कारको प्रयास भयो, ममाथि । उसलाई खोइ सजाय रु हामीलाई न्याय दिएको खै ?”

यस्तै, प्रदर्शनमा सहभागी कृतिका यादवले नेपालको न्यायालयमा न्यायाधीश नै बिक्ने गरेको आरोप लगाइन् । उनले आरोपित गिरीको ‘कम्प्लेन’ नै न्याय परिषद्ले लिन नमानेको बताइन् ।
जिल्ला प्रहरी कार्यालय कपिलवस्तुमा न्यायाधीश गिरीमाथि वैवाहिक बलात्कार र घरेलु हिंसाको जाहेरी छ ।