काठमाडौं । वैशाख १ मा दयाहाङ राई र मिरूना मगर चलचित्र ‘जारी’ पनि रिलिज हुने भएको छ। चलचित्रले वैशाख १ गतेलाई प्रदर्शन मिति घोषणा गर्दै आधिकारिक पोस्टर सार्वजनिक गरेको हो ।

‘जारी’ले लिम्बू समुदायमा चलिरहेका प्रथामा आधारित कथा पेस गर्छ। यस फिल्मकाे घोषणा गरेसँगै सोही मितिमा रिलिज हुने सिनेमाको संख्या ३ पुगेको छ।

सोमबार सार्वजनिक भएको सिनेमाको पोस्टरमा मुख्य कलाकार दया र मिरूनालाई देखाइएको छ। फिल्मको लेखन तथा निर्देशन उपेन्द्र सुब्बाले गरेका हुन्।

फिल्ममा दयाहाङ र मिरुनासहित विजय बराल, रोयदीप श्रेष्ठ, रेखा लिम्बू, प्रेम सुब्बा, पुष्कर गुरुङ र कमलमणि नेपालको अभिनय छ ।

विकास आचार्य निर्देशित ‘नाईं नभन्नु ल ६’ र सुदर्शन थापा निर्देशित ‘प्रसाद २’ले पनि सोही मितिमा आफ्नो रिलिज गर्ने घोषणा गरिसकेका छन्।