काठमाडौँ । आइसिसी विश्वकप लिग २ त्रिकोणात्मक ओडीआई सिरिजअन्तर्गत आजको खेलमा नेपाल विजयी भएको छ । नेपालले यूएईलाई ४२ रनले पराजित गरेको हो ।

दुबई अन्तर्राष्ट्रिय क्रिकेट रंगशालामा भएको खेलमा आफ्नो पक्षमा जित निकालेसँगै शीर्ष तीनमा रहेर विश्वकप छनोट खेल्ने सम्भावना कायमै राखेको छ ।

नेपालले दिएको २३० रनको लक्ष्य पछ्याएको यूएई १८७ रन बनाउँदै अल आउट भएको हो । नेपालले निर्धारित ओभरमा ८ विकेट गुमाएर २२९ रनको योगफल बनाएको थियो ।

नेपालका लागि भीम सार्कीले अर्धशतक बनाए । उनले ९९ बल खेल्दै ७० रन बनाए भने सन्दीप लामिछाने २७ रनमा आउट भएका थिए । यस्तै, कुशल मल्लले ३२ बनाउँदा करन केसीले १७ रन बनाए ।

बलिङतर्फ सोमपाल कामी र दिपेन्द्र सिंह ऐरीले ३–३ विकेट लिए । यस्तै, करण केसी, सन्दीप लामिछाने, आसिफ शेख र कुशल मल्लले १–१ विकेट लिए ।

यूएईका लागि आसिफ खानले ११५ बलमा ८२ रन बनाए ।