अमेरिकी नियामकहरूले देशको सबैभन्दा ठूलो बैंक सिलिकन भ्याली बैंक बन्द गर्न आदेश दिएका छन्। अमेरिकाको १६औँ ठूलो बैंक सिलिकनको सम्पत्ति करिब २ खर्ब १० अर्ब डलर छ । यो नयाँ युगको प्राविधिक कम्पनीहरू र उद्यम पूंजी लगानी कम्पनीहरूलाई आर्थिक सहयोग प्रदान गर्ने देशको अग्रणी बैंक हो।

सिलिकन भ्याली बैंक विगत केही महिनादेखि आर्थिक संकटबाट गुज्रिरहेको थियो, जसका कारण बैंकले आफ्ना केही पोर्टफोलियो सेक्युरिटीहरू करिब १.८ बिलियन डलर घाटामा बेच्नु परेकाे थियाे । यो खबर बजारमा आएसँगै बैंकको शेयर एकै दिनमा ६० प्रतिशतले घटेको छ । यो सन् २००८ को वित्तीय संकटपछिको अमेरिकी इतिहासमा सबैभन्दा ठूलो असफलता हो।

अमेरिकी बैंक डुब्दा विश्व बजारमा त्रास फैलिएको छ । अमेरिकी शेयर बजारको मुख्य परिसूचक डाउ शुक्रबारको सत्रमा १.०७ प्रतिशतले झरेको छ ।

याेसँगै युरोपेली सेयर बजारमा पनि दबाब देखियाे । लन्डन बजार १.६७ प्रतिशत, फ्रान्कफर्ट बजार १.३१ प्रतिशत, पेरिस बजार १.३० प्रतिशत र रोम बजार १.५५ प्रतिशतले घट्याे ।

यो खबरपछि एसियाली बजार पनि राताम्य भएर बन्द भयो । हङकङको बजार ३.०४ प्रतिशतले, सांघाईको बजार १.४० प्रतिशतले, टोकियोको बजार १.६७ प्रतिशतले, बैंककको बजार ०.९० प्रतिशतले घटेको छ ।