दाङ । दाङको देउखुरीमा शुक्रबार बिहान दुई बस आपसमा ठोक्किदा एक जनाको मृत्यु भएको छ । २३ जना घाइते भएका छन् ।

दुर्घटनामा परेर रोल्पा रुन्टीगढी–९ कि २४ वर्षीया शोभा परियारको मृत्यु भएको जिल्ला प्रहरी कार्यालय दाङका प्रवक्ता प्रहरी नायब उपरीक्षक राजन गौतमले जानकारी दिए । दुर्घटनामा शोभाका दुई छोरासहित २३ जना घाइते भएको र घाइतेमध्ये १२ जनाको अवस्था गम्भीर रहेको गौतमले जानकारी दिए ।

लमहीबाट भालुवाङतर्फ जाँदै गरेको लु २ ख ७८५ नम्बरको बस र वीरगन्जबाट दाङको तुलसीपुर आउँदै गरेको ना ५ ख ४८९८ नम्बरको बस लमही नगरपालिका–३ फल्कापुरमा ठोक्किएर दुर्घटना भएको हो । दुर्घटना बिहान करिब पौने ७ बजे भएको गौतमले बताए ।

डिएसपी गौतमले गम्भीर घाइतेहरूमध्ये ७ जनालाई भैरहवा, ३ जनालाई राप्ती स्वास्थ्य विज्ञान प्रतिष्ठान घोराही र २ जनालाई नेपालगञ्ज रिफर गरिएको जानकारी दिए । अन्य घाइतेहरूको लमही अस्पतालमा उपचार भइरहेको छ ।