स्पेनी सरकारले पुरुषले घरायसी काम गर्छन वा गर्दैनन् भन्ने जानकारी पाउन एउटा एप लन्च गर्ने भएको छ । सरकारले यो एप ल्याउनुको उद्देश्य महिला र पुरुषबीच घरायसी कामलाई बाँडफाँड गर्नु हो।

यो एपले घरका प्रत्येक सदस्यले काममा कति समय बिताइरहेका छन् भनेर पनि पत्ता लगाउनेछ। यद्यपि एपले कसरी काम गर्छ भन्ने बारे कुनै जानकारी दिइएको छैन। एप लन्च गरेपछि, स्पेन पुरुष र महिलाको घरेलु कामको निगरानी गर्ने पहिलो देश बन्नेछ ।

स्पेनको लैङ्गिक समानता मन्त्री एन्जेला रोड्रिगेजले एप आगामी गर्मी सिजनमा लन्च गर्ने योजना रहेको बताइन्।

‘अहिले मानिसहरूबीच कामको बाँडफाँडमा ठूलो असमानता छ ।’ उनले भनिन्, ‘पुरुषको तुलनामा महिलाले घरको काममा बढी समय बिताउँछन् ।’

राष्ट्रिय तथ्याङ्क संस्थानको सर्वेक्षणमा सहभागी झण्डै आधा महिलाले घरको अधिकांश काम आफूले गर्ने गरेको बताएका छन् । त्यहीँ १५ प्रतिशत भन्दा कम पुरुषहरूले भने कि उनीहरू घरको अधिकांश काम गर्छन्।

किन चाहियो यो एप ?
स्पेनमा धेरै वर्षदेखि घरेलु काममा महिला र पुरुषबीचको असमानताले कानुनी विवादको रंग लिएको छ । अप्रिल २०१७ मा, क्यान्टाब्रियाको एक अदालतले एक व्यक्तिलाई आफ्नी पूर्व पत्नीलाई २० लाख रुपैयाँ तिर्न आदेश दिएको थियो।

यस वर्षको सुरुमा, भेलेज-मालागाको एक अदालतले एक व्यापारीलाई आफ्नी पूर्व पत्नीलाई २५ वर्षको बेतलबी घरेलु श्रमको लागि १.८३ करोड रुपैयाँ तिर्न आदेश दिएको थियो।

महिलाका अनगिन्ती कामको उजागर हुने
विज्ञहरुले स्पेन सरकारको यो एपले घर वरपरका महिलाहरुको अगणित कामका साथसाथै ‘मानसिक भार’लाई पनि उजागर गर्ने आशा लिएका छन् ।

हाल स्पेनमा महिला सशक्तिकरण र लैङ्गिक समानता हटाउन निरन्तर प्रयास भइरहेका छन् । यसै वर्षको मार्चमा स्पेनले लैङ्गिक समानता कानून ल्याएको छ। यसअन्तर्गत कर्पोरेट बोर्डमा कम्तिमा ४० प्रतिशत महिला हुनु आवश्यक छ ।

यससँगै मन्त्रिपरिषद्मा महिलाको कोटा पनि तोकिएको छ । संसदको तल्लो सदनमा ४४ प्रतिशत र माथिल्लो सदनमा ३९ प्रतिशत महिला कोटा राखिएको छ ।