पाल्पा । जिल्लाको रैनादेवी छहरा गाउँपालिका ८ सत्यवतीमा आज साँझ जिप दुर्घटना हुँदा तीन जनाको मृत्यु भएको छ । घटनामा ११ जना घाइते भएका छन् ।

मृत्यु हुनेमा दुई महिला र एक पुरुष रहेको जिल्ला प्रहरी कार्यालय पाल्पाले जनाएको छ । उनीहरूको पहिचान खुल्न बाँकी रहेको छ ।

अर्घाखाँचीतर्फ जाँदै गरेको लु १ च ९०२४ नम्बरको जिप ढोरपाटन सडकमा दुर्घटनामा परेको हो ।

घाइतेहरूको उद्धार गरी रुपन्देहीस्थित लुम्बिनी प्रादेशिक अस्पताल पठाइएको छ । जिप सडकबाट करिब सय मिटर तल खसेको छ ।