काठमाडौँ । विश्वकप छनोटअन्तर्गत पहिलो खेलमा नेपाल पराजित भएको छ । जिम्बाव्वेविरुद्ध कमजोर बलिङ गरेको नेपाल पराजित हुन पुगेको हो ।

नेपालले दिएको २९१ रनको लक्ष्य पछ्याएको घरेलु टोली जिम्बाव्वे आठ विकेटले विजयी भएको हो ।

जिम्बाव्वेविरुद्ध नेपालले विशाल लक्ष्य दिए पनि बलिङ कमजोर हुँदा पराजित बन्न पुगेको हो । नेपालका लागि सोमपाल कामी र गुल्सन झाले एक–एक विकेट लिए ।

ब्याटिङतर्फ नेपालका लागि ओपनर कुशल भुर्तेलले ९९ रन बनाए । ९५ बल खेलेका उनले १३ चौका र दुई छक्का प्रहार गरे ।

अर्का ओपनर आसिफ शेखले ६६ रन बनाए । सय बल सामना गरेका उनले सात चौका प्रहार गरे ।

यस्तै, कुशल मल्ल ४१ रनमा आउट हुँदा कप्तान रोहित पौडेलले ३१ रन बनाए । गुल्सन झाले १३ रन बनाउँदा भीम सार्कीले खाता खोल्न सकेनन् ।

जिम्बाव्वेका लागि कप्तान क्राइग एर्भिन सर्वाधिक नटआउट १२१ रन बनाए । यस्तै, सेन विलियन्सले नटआउट १०२ रन बनाए ।