काठमाडौं । काठमाडौं महानगरपालिकाले हिन्दी सिनेमा प्रदर्शन गर्न नदिएपछि हल सञ्चालकहरू त्यसविरुद्ध अदालत जाने भएका छन् ।

काठमाडौं महानगरपालिकाभित्रका सिनेमा घरमा आजबाट हिन्दी सिनेमा चलाउन नदिने निर्णय नगरप्रमुख बालेन्द्र साहले गरेका थिए ।

नगरप्रमुख साहको निर्णयविरुद्ध अदालत जानका लागि आफूहरू कानुन व्यवसायीहरूसँग छलफलमा रहेको क्यूएफएक्सका सञ्चालकमध्येका एक भाष्कर ढुंगानाले बताए । उनले आजै आफूहरू अदालत जाने तयारीमा जुटेको जानकारी पनि दिए ।

संघीय सरकारले हिन्दी सिनेमा ‘आदिपुरुष’ सेन्सर गरेर चलाउन अनुमति दिएको थियो । तर काठमाडौँ महानगरले रोकेपछि संघ सरकारको निर्णय स्थानीय सरकारले रोक्न नमिल्ने भन्दै हल सञ्चालकहरू अदालत जान लागेका हुन् ।

सिनेमा चलाउन दिने अधिकार संघ सरकारको हो कि स्थानीय सरकारको हो स्पष्ट हुनुपर्ने हल सञ्चालकहरूको भनाइ छ ।

सञ्चार मन्त्रालयले विज्ञप्ति निकालेर सिनेमा चलाउन दिने वा नदिने स्पष्ट नगरी ध्यानाकर्षण भएको उल्लेख गरेको छ । सेन्सर बोर्डले सेन्सर गरेर चलाउन दिएपछि चलाउन पाउनु पर्ने उनीहरूको तर्क छ ।

नगर प्रमुख साहले भने हिन्दी सिनेमा ‘आदिपुरुष’मा सीता भारतकी छोरी हुन् भन्ने संवाद हटाउन माग गरेका थिए ।

‘आदिपुरुष’मा रहेको विवादित संवाद हटाउन तीन दिनको समय दिए पनि सो संवाद नहटाइ भारतसहित विश्वभर चलाइएको भन्दै काठमाडौंका हलमा आजदेखि कुनै पनि हिन्दी सिनेमा चल्न दिइएको छैन ।