काठमाडौँ । सरकारले १० सचिवको सरुवा गरेको छ । बुधबार बसेको मन्त्रिपरिषद्को बैठकले १० सचिवको सरुवा गरेको एक मन्त्रीले जानकारी दिए ।

ती मन्त्रीका अनुसार सचिव मधुसुदन बुर्लाकोटीको उपराष्ट्रपति कार्यालयमा सरुवा भएको छ । बागमती प्रदेशको मुख्यसचिव रहेका मुकुन्द निरौलालाई उद्योग वाणिज्य तथा आपूर्ति मन्त्रालयको सचिवमा सरुवा गरिएको छ ।

रविलाल पन्थलाई युवा तथा खेलकुद मन्त्रालयको सचिव बनाइएको छ भने सुर्य गौतमलाई निर्वाचन आयोगमा पठाइएको छ । निर्वाचन आयोगमा सचिव रहेका गोकर्णमणि दवाडीलाई भूमि व्यवस्था तथा सहकारी मन्त्रालयको सचिवमा सरुवा गरिएको छ ।

सचिव तोयम रायलाई तथ्यांक कार्यालयमा सरुवा गरिएको छ । दामोदर रेग्मीलाई सार्वजनिक खरिद अनुगमन कार्यालयको सचिव बनाइएको छ । भने गोपी खनाललाई प्रधानमन्त्री तथा मन्त्रिपरिषद्को कार्यालयमा ल्याइएको छ ।

भर्खरै सचिवमा बढुवा भएका घनश्याम उपाध्यायलाई बागमती प्रदेशको मुख्यसचिवमा पदस्थापन गरिएको छ । लक्ष्मी बस्नेतलाई गण्डकी प्रदेशको मुख्यसचिव बनाइएको छ ।