काठमाडौँ । राष्ट्रिय स्वतन्त्र पार्टी(रास्वपा)का ४ सांसद निर्वाचन आयोगको कारबाहीमा परेका छन् । पारदर्शिताको कुरा गरेर नथाक्ने रास्वपाका सांसदलाई निर्वाचन आयोगले निर्वाचन खर्च विवरण सार्वजनिक नगरेकोमा १५÷१५ हजार जरिवाना गरेको हो ।

जरिवाना पर्नेमा काठमाडौँबाट प्रत्यक्षतर्फ रास्वपाबाट जितेका ४ सांसद् छन् । काठमाडौं ६ बाट विजयी भएर छोटो समय शिक्षा मन्त्री बनेका शिशिर खनालले खर्च विवरण सार्वजनिक नगरेर १५ हजार जरिवानामा परेका छन् ।

रास्वपाका संसदीय दलका उपनेतासमेत रहेका विराजभक्त श्रेष्ठ पनि कारबाहीमा परेका छन् । उनी काठमाडौँको क्षेत्र नं ८ बाट प्रतिनिधि सभा सदस्य निर्वाचित भएका थिए । त्यस्तै काठमाडौँ २ बाट निर्वाचित भएकी सोविता गौतम पनि कारबाहीमा परेकी छन् ।

त्यस्तै रास्वपाबाटै काठमाडौँ ७ बाट निर्वाचित गणेश पराजुली पनि १५ हजार तिर्नुपर्ने सूचीमा परेका छन् ।

आयोगले मंसिर ४ गते सम्पन्न प्रतिनिधि सभा सदस्य तथा प्रदेश सभा सदस्य निर्वाचनमा उम्मेदवार भएर तोकेको समयभित्र प्रदेश वा जिल्ला निर्वाचन कार्यालयमा निर्वाचन खर्चको विवरण पेश गर्न भनेको थियो ।

भनेको समयमा खर्च विवरण सार्वजनिक नगरेपछि निर्वाचन (कसुर तथा सजाय) ऐन, २०७४ को दफा ३१ को उपदफा (२) बमोजिम गत वैशाख ६ गतेदेखि १२ गतेसम्म निर्वाचन खर्चको विवरण सार्वजनिक गरेको लिखित जानकारी आफू उम्मेदवार रहेको प्रदेश वा जिल्ला निर्वाचन कार्यालयमा गराउन निर्देशन आयोगले दिएको थियो। त्यस समयमा सार्वजनिक नगरेपछि जरिवाना गरिएको हो ।