काठमाडौँ । अख्तियार दुरुपयोग अनुसन्धान आयोगले मुगुको छायाँनाथ रारा नगरपालिका नगर कार्यपालिका तत्कालीन निमित्त प्रमुख प्रशासकीय अधिकृत ललितजंग मल्लसहित सात जनाविरुद्ध भ्रष्टाचार मुद्दा दायर गरेको छ ।

नगरपालिकाको वडा नम्बर २ मा पार्क निर्माण गर्दा अनियमितता गरेको अभियोगमा उनीहरूविरुद्ध शुक्रबार विशेष अदालत काठमाडौंमा आरोप–पत्र दायर गरिएको अख्तियारका प्रवकता भोला दाहालले जानकारी दिए ।

प्रवक्ता दाहालले निमित्त प्रमुख प्रशासकीय अधिकृत मल्लसहित तत्कालीन लेखापाल रुनबहादुर सेजुवाल, कम्प्युटर अपरेटर केशर बहादुर रावल, तत्कालीन इन्जिनियर महेश सिंह कठायत र तत्कालीन असिस्टेन्ट सव–इन्जिनियर हस्तबहादुर मल्लसमेतविरुद्ध भ्रष्टाचार मुद्दा दायर गरिएको जानकारी दिए ।

पार्क निर्माण उपभोक्ता समितिका अध्यक्ष विष्णुबहादुर रावल र कोषाध्यक्ष बसन्ती रावलविरुद्ध समेत अख्तियारले मुद्दा दायर गरेको छ ।

उनीहरूले जिल्ला वन कार्यालय कम्पाउण्डभित्रको जग्गामा पार्क निर्माण गर्ने अनुमतिसमेत नलिई डिजाइन, नक्सा र लागत अनुमान तयार गर्न लगाई स्वीकृतगरी उपभोक्ता समितिलाई ३८ लाख ४ हजार ५०० पेश्की उपलब्ध गराएको अभियोग पत्रमा उल्लेख छ ।

जिल्ला वन कार्यालयले अनुमति नदिएकोले सम्झौता बमोजिम पार्क निर्माण हुन नसक्ने अवस्थामा उपभोक्ता समितिलाई भुक्तानी भएको पेश्की फर्छ्यौट हुन नसकेकोले उनीहरूविरुद्ध भ्रष्टाचार मुद्दा दायर गरिएको अख्तियारले जनाएको छ ।

उपभोक्ता समितिका अध्यक्ष र कोषाध्यक्षले काम हुन नसक्ने अवस्थामा बाँकी पेश्की रकम फर्स्यौट गर्नु पर्नेमा नगरी भ्रष्टाचार गरेको अख्तियारको दाबी छ ।

निमित्त प्रमुख प्रशासकीय अधिकृत मल्लसहित तत्कालीन लेखापाल सेजुवाल, कम्प्युटर अपरेटर रावल, तत्कालीन इन्जिनियर सिंह र तत्कालीन असिस्टेन्ट सव–इन्जिनियर मल्लविरुद्ध ३८ लाख ४७ हजार ५०० रकम बिगो कायम गरी मुद्दा दायर गरिएको अख्तियारले जनाएको छ ।

उपभोक्ता समितिका अध्यक्ष विष्णुबहादुर रावल र कोषाध्यक्ष बसन्ती रावलविरुद्ध ३३ लाख ८२ हजार ४१७ रुपैयाँ बिगो कायमगरी मुद्दा दायर गरिएको अख्तियारले जनाएको छ ।