नेपालगन्ज । नेकपा (एमाले) अध्यक्ष तथा पूर्वप्रधानमन्त्री केपी शर्मा ओलीले सुन तस्करीमा सरकार आफुलाई बचाउने र अरुलाई फसाउने खेलमा लागेको आरोप लगाएका छन् । ओलीले सरकारको जानकारीबिना एयरपोर्टमा एक क्विन्टल सुन भित्रन सम्भव नभएको पनि बताए ।

बाँकेको नेपालगन्जमा लुम्बिनी प्रदेशस्तरीय जनप्रतिनिधिको प्रशिक्षण भेलाको सम्बोधन गर्दै शनिबार एमाले अध्यक्ष ओलीले ‘एउटा सुइसमेत छिर्न नसक्ने एयरपोर्टमा कसरी एक क्विन्टल सुन भित्रिन सम्भव हुन सक्छ भन्दै त्यहाँका मान्छे, मेसिन सुतेका बेला त्यो सुन भित्रिएको हो ? भनी प्रश्न पनि गरे ।

उनले सत्ताधारी दलले देश लुटिरहेको आरोपसमेत लगाए । गठबन्धनका नाममा सत्तारुढ दलले कुनै पनि सार्थक काम गर्न नसकेको ओलीको आरोप थियो ।

बेथिती, भ्रष्टाचार बढेकोले देशमा एमालेको विकल्प नभएको ओलीले बताए । ‘गठबन्धनका नाममा सबेले मिलीजुली देशलाई लुट्ने काम भइरहेको छ । अब एमालेको विकल्प छैन,’ अध्यक्ष ओलीले भने ।