काठमाडौँ । उपप्रधान तथा रक्षामन्त्री एवं कांग्रेसका उपसभापति पूर्णबहादुर खड्काले वर्तमान गठबन्धन सरकारको स्थायित्वका विषयमा शंका नगर्न आग्रह गरेका छन् ।

सत्ता गठबन्धनमा रहेको माओवादी केन्द्र, जनता समाजवादी, एकीकृत समाजवादी र कांग्रेस मिलेरै अगाडी बढिरहेकोले सरकारको स्थायित्वमा कसैलाई पनि शंका नगर्न उनले आग्रह गरेका हुन् । खड्काले भने, ‘सरकारको स्थायित्वमा कुनै शंका नगर्न सबैलाई आग्रह गर्दछु ।’

नेपाल टेलरिङ व्यवसायी महासंघको राष्ट्रिय महाधिवेशनलाई शनिबार सम्बोधन गर्दै उपप्रधानमन्त्री खड्काले त्यस्तो बताएका हुन् ।

सरकारले नागरिकलाई सुशासनको प्रत्याभूति दिलाउँदै भ्रष्टाचार नियन्त्रणका काम गरिरहेकाले जनताको पूर्ण समर्थन पाएको उपप्रधानमन्त्री खड्काको भनाइ थियो ।

‘सरकार सुशासन र भ्रष्टाचार नियन्त्रणलाई प्राथमिकतामा राख्दै आर्थिक सुधारको दिशामा अघि बढेको छ,’ उनले भने ।

नेपालमा उद्यमदेखि रोजगारी सिर्जना गर्नमा समेत साना व्यवसायी तथा टेलरिङ व्यवसायीको महत्वपूर्ण भूमिका रहेको बताउँदै उपप्रधानमन्त्री खड्काले टेलरिङ व्यवसायलाई थप सुधार गर्न सरकार सधै तयार रहेको बताएका थिए ।