काठमाडौं। एसिया कप क्रिकेट प्रतियोगिताअन्तर्गत नेपाल र भारतबीचको खेल आज हुँदैछ । उक्त खेल श्रीलंकाको क्यान्डीमा नेपाली समयानुसार दिउँसो सवा ३ बजे हुनेछ ।

खेल वर्षाले प्रभावित गर्ने सम्भावना छ । मौसम अपडेटका अनुसार नेपाल र भारतबीच खेल हुने श्रीलंकाको पल्लेकेलेमा ८० प्रतिशतसम्म वर्षा हुने सम्भावना छ ।

खेलको टस नेपाली समयअनुसार, २:४५ बजे हुनेछ । टस हुने समयमा पालेकेलमा २२ प्रतिशत वर्षाको सम्भावना देखाइएको छ । साँझ ६ बजेसम्म पनि वर्षाको सम्भावना २२ प्रतिशत नै देखिन्छ ।

वर्षाका कारण खेल रद्द भएमा नेपाल र भारतले अंक एक/एक बाँड्नेछन् । अंक बाँडे पनि भारत सुपर फोरमा पुग्नेछ ।

पाकिस्तान दुई खेलमा एकमा जित र एकमा अंक बाँड्दै तीन अंकका साथ सुपर फोरमा पुगिसकेको छ। भारतले पाकिस्तानसँगकाे खेलमा अंक बाँडेसँगै उसकाे एक अंक छ । एक खेल खेलेको नेपाल अंकविहीन छ ।

समूह चरणको अन्तिम खेलमा नेपाल विजयी भएमा एसिया कपको सुपर फोरमा पुग्नेछ । अन्यथा नेपाल प्रतियोगिताबाट बाहिरिनेछ ।