काठमाडौँ । सरकारसँग शुक्रबार भएको ७ बुँदे सहमति राहत शिक्षकहरूले नमान्ने भएका छन् । राहत शिक्षक केन्द्रीय समितिका अध्यक्ष खेमराज अधिकारीले सहमतिलाई धोका भन्दै आफूहरुले नमान्ने बताए ।

सरकारसँग सिंहदरबारस्थि गृह मन्त्रालयमा भएको वार्तामा सहभागी भएका अध्यक्ष अधिकारीसहितका राहत शिक्षक केन्द्रीय समितिका पदाधिकारीहरूले सहमतिमा हस्ताक्षर गरेनन् । अधिकारीले सात बुँदे सहमतिमा आफूहरुको तर्फबाट हस्ताक्षर नगरिएको बताए । उनले शिक्षक महासंघबाट अलग्गिएर आन्दोलन थाल्ने जानकारी दिए ।

राहत शिक्षकलाई पनि सहमतिमा ल्याउन उपप्रधान तथा गृहमन्त्री नारायणकाजी श्रेष्ठले लामो छलफल गरे पनि सार्थकता पाउन सकेन ।

अहिलेको सहमतिले आफूहरुको मागलाई सम्बोधन नगर्ने भन्दै राहत शिक्षकका प्रतिनिधिहरू हस्ताक्षर नै नगरी सिंहदरबारबाट बाहिरिए । आफूहरुका माग सम्बोधन नभएपछि अब नयाँ आन्दोलनका लागि अलग्गै विज्ञप्ति निकाल्ने अधिकारीले बताए ।

२०७५ सालअघि नियुक्त भएका राहत शिक्षकहरू विस्थापित नहुने गरी विद्यालय शिक्षा विधेयकमा समेट्नु पर्ने आफूहरुको माग सहमतिले सम्बोधन नगरेको अधिकारीले बताए ।

अधिकारीले सबै राहत शिक्षहरुलाई काठमाडौं नछोड्न पनि आग्रह गरेका छन्। अहिले राहत शिक्षकहरुको केन्द्रीय समितिको आकस्मिक बैठक बस्दैछ।