५ वर्षअघि मन्जु बिस्टले पोखरामा सञ्चालनमा ल्याईन्, ओयासिस स्पा एण्ड ब्युटि केयर कम्पनी पोखरामा खुल्यो । बाँके स्थायी ठेगाना भए पनि उनको कर्मथलो पोखरा बन्यो । पोखरा भिलेजबाट सुरु भएको यात्रा होटेल हुँदै क्रमशः कुटी, टुकी, पोखरा ग्रान्ड (एक मात्र पाँचतारे होटेल), माउन्टेन ग्लोरी, डिलक्स रिसोर्ट, होटेल सहारा रिसोर्ट, अतिथि रिसोर्ट, फिसटेल लजमा समेत बिस्तार भयो । हाल यसका ९ वटा ब्राञ्चहरु सञ्चालनमा आईसकेका छन् । मन्जुले ब्युटिसियनको तालिम पनि प्रदान गर्दै आएकी छिन् । छोटो समयमा व्यापारिक उचाई लिन सफल मञ्जुसँग मेरो न्युज डट्कमका लागि नरेन्द्र रौलेले गरेको कुराकानी :

पोखरा पहिलो पटक कहिले आउनु भयो ?
२० वर्षको उमेर छँदा पोखरा आईपुगें । ९ वर्ष पुगिसक्यो यता आएको । विवाह भएपछि पोखरा आईपुगियो । मलाई पोखरा सपनाको शहर लाग्थ्यो । विवाहपछि भने यतै कर्मथलो बन्यो । पोखरा बस्ने रहर पनि पूरा भयो ।

ब्युटिसियन पेशातिर कसरी आकर्षित हुनुभयो ?
एसएलसी दिएपछि मैले केही समय रामारोशन बचत नामक सहकारीमा काम गरें । त्यो मेरो जीवनकै पहिलो जागिर थियो । तर, मनभित्र ब्युटिसियन बन्ने रहर थियो । पछि पोखरा आएपछि ब्युटिपार्लरको एड्भान्स कोर्ष र स्पाको कोर्स गरें । प्राक्टिकल कोर्षपछि ब्यबसायिक रुपमा काम थालियो । सुरुमा पोखरा भिलेज रिसोर्टमा साझेदारीमा काम सुरु भयो । पछि आफ्नै काम सुरु गरियो ।

तपाईंले सञ्चालन गरेको ओयासिस स्पा एण्ड ब्युटि केयरमा रोजगारी कति जनाले पाएका छन् ?
सबै ब्रान्च गरेर ४० जना जतिले पाएका छन् । स्टाफहरुको संख्या बढ्ने क्रममा छ । हामीसँग ५ वर्ष निरन्तर काम गर्नेहरु छन् । ९ वर्ष काम गर्नेहरु छन् । खान, बस्नको सुविधा छ । चित्त बुझ्दो स्यालरी दिएका छौं । खान बस्नबाहेक कमिसन, लगायत सबै सुबिधा दिएका छौं ।

तपाईंको स्पेशलाइजेसन के मा हो ?
थेरापी नै हो । स्किन केयर, मेडिक्योर, पेडिक्योर ।

कोभिड अगाडी र पछाडीको व्यवसायमा ठूलो अन्तर देखियो । तपाईंको अनुभब कस्तो रह्यो ?
सुरुमा स्पामा विदेशीहरुको आकषर्ण धेरै नै देखिन्थ्यो । तुलनात्मक रुपमा नेपालीको कम आकर्षण देखिन्थ्यो । कोभिडपछि नेपाली, विदेशीको उपस्थिीति ५०-५० प्रतिशत देखियो । नेपालीहरुको घुम्ने बानी विकास भयो । स्पा के हो भनेर बुझने, अनुभब गर्ने बानीको विकास भयो । हाम्रो समाजमा स्पालाई राम्ररी बुझेका छैनन् । धेरैको परिष्कृत धारणा छैन । चाहे उपभोक्ता हुन् या अरु व्यक्ति । यो हस्पिटालिटी क्षेत्र पर्यटकलाई सेवा, सुबिधा प्रदान गर्ने विषय हो । तर, बहसको विषय बन्दैन ।
कोभिड पहिलाको जस्तो व्यापारले लय नसमाते पनि लगभग छेउछाउमा पुगेको छ । व्यापारमा असर त एकदमै गर्‍यो । तर, भाडा तिर्न परेन होटेलसँग पार्टनरसिप थियो ।

तपाईं यहाँसम्म आउनुमा कसको हात, साथ छ ?
धेरैको हात छ । आमाले छोरीप्रति गर्नु पर्ने कर्तब्य गर्नु भयो । आमालाई सम्झिदा आशु आउँछ । सम्पूर्ण देन उहाँकै हो । त्यसबाहेक श्रीमान्को साथ र सहयोग छ, पूर्ण रूपमा ।

व्यवसायमा सफलता पाउन के गर्न जरुरी छ ?

ब्यबसायमा सफलता पाउन निरन्तरता दिन जरुरी छ । यो नै पहिलो मापन हो । निरन्तर प्रयास नै सफलताको आधार हो । धैर्य गर्नु पर्‍यो। त्यो जरुरी छ ।

आगामि दिनमा शाखा बिस्तार गर्ने योजना छ कि ?
कोभिड अगाडीसम्म ५ वटा र त्यसपछि ५ वटासम्म ब्रान्च थपिए । काठमाडौं, भैरहवा, नेपालगञ्जबाट ब्रान्च लिन माग आएको छ । तर, त्यता बिस्तार भईसकेको छैन ।