काठमाडौं । काठमाडौंमा जारी त्रिकोणात्मक टी-२० श्रृखलाअन्तर्गतको खेलमा नेपालले हङकङलाई २१४ रनको लक्ष्य दिएको छ ।

शनिबार मुलपानी क्रिकेट मैदानमा टस जितेर ब्याटिङ रोजेको नेपालले निर्धारित २० ओभरमा ६ विकेट गुमाएर २१३ रन बनाएको हो ।

नेपालका लागि दीपेन्द्रसिंह ऐरी र कुशल मल्लले शतकीय साझेदारी गरे । कुशल मल्लले ९२ रनको योगदान गरे । त्यस्तै दीपेन्द्रले ५७ रन बनाए । उनले ३४ बलको सामना गरी दुई छक्का र ६ चौका हिर्काए ।

नेपालले ५५ रनमै चार विकेट गुमाएर खराब सुरुवात गरेकाे थियाे । त्यसपछि कुशल मल्ल र दीपेन्द्रसिंह ऐरीले नेपालको पाली सम्हालेका थिए । उनीहरुले एक सय ४५ रनको उत्कृष्ट साझेदारी गरेका थिए ।

नेपालले गत बिहीबार हङकङलाई ६ विकेट र गत बुधबार यूएईलाई ७ विकेटले हराएको हो।

आइतबार हङकङ र यूएईबीच प्रतिस्पर्धा हुँदै छ भने पर्सि सोमबार नेपाल र यूएई तथा बुधबार हङकङ र यूएई भिड्दै छन्।