पोखरा । पोखराको एक होटलमा अचेत भेटिएकी महिलाको मृत्यु भएको छ ।

पोखरा नागढुंगास्थित युनिक होटलमा मंगलबार साँझ करिब ७ बजे तनहुँ भिमादकी ३८ वर्षीया सुकु विक अचेत अवस्थामा फेला परेकी थिइन् ।

२ वर्षदेखि सोही ठाउँकै शिला रेस्टुरेन्टमा काम गर्दै आएकी विकको अचेत अवस्थामा होटलबाट उद्धार गरेर चरक मेमोरियल अस्पतालमा उपचारका लागि लगिएको थियो । तर, उपचारकै क्रममा साँझ करिब साढे ७ बजे मृत्यु भएको प्रहरी स्रोतले जनाएको छ ।

जिल्ला प्रहरी कार्यालय कास्कीका सूचना अधिकारी डीएसपी श्रवणकुमार विकका अनुसार प्रारम्भिक अनुसन्धानमा घटना शंकास्पद रहेको खुलेको बताएका छन्,उनले भने ‘घटना अलि शंकास्पद नै छ । हामीले अनुसन्धान गरिरहेका छौं ।

कास्की प्रहरीले विकको शव पोष्टमार्टमका लागि पोखरा स्वास्थ्य विज्ञान प्रतिष्ठान लगिएको जनाएको छ ।

उक्त घटना अनुसन्धानका लागि प्रहरीले ६ जनालाई नियन्त्रणमा लिएको छ । नियन्त्रणमा लिएकाहरुको नाम प्रहरीले सार्वजनिक गरेको छैन ।