काठमाडौं । आगामी पुसमा बस्ने कांग्रेस महासमिति बैठकमा वैदिक सनातन हिन्दु राष्ट्र स्थापनाको विषय प्रवेश गराउन पार्टी सभापति शेरबहादुर देउवा सकारात्मक रहेको केन्द्रीय सदस्य शंकर भण्डारीले बताएका छन् ।

शुक्रबार बिहान धुम्बाराहीस्थित निवासमा भेटेर आफूले राखेको धारणामा देउवा सहमत भएको उनको भनाइ छ ।

‘आदरणीय पार्टी सभापति शेरबहादुर देउवाज्यूसँग बिहान धुम्बाराहीस्थित उहाँको निवासमा भेट गरी आसन्न महासमिति बैठकमा वैदिक सनातन हिन्दु राष्ट्र स्थापनाको विषयलाई प्रवेश गराउनुपर्छ भनी आफ्नो धारणा राखें । यस विषयमा पार्टी सभापतिज्यू सकारात्मक रहेको पाएको छु’ सामाजिक सञ्जालमा उनले लेखेका छन् ।

भण्डारीले वैदिक सनातन हिन्दु राष्ट्र स्थापना, प्रदेश संरचना खारेजी र निर्वाचन प्रणाली परिवर्तन गर्ने विषयमा आफ्नो निरन्तर खबरदारी रहने जानकारीसमेत दिएका छन् ।