काठमाडौं । प्रधानमन्त्री पुष्पकमल दाहाल ‘प्रचण्ड’ले हिमालय : जसले हामीलाई जलवायु प्रकोपबाट बचाउँछ विषयक उच्च स्तरीय गोलमेच बैठकमा आफ्नो अध्यक्षता सहित सम्बोधन गरेका छन् ।

नेपालले जलवायु परिवर्तन सम्बन्धी संयुक्त राष्ट्रसंघको कार्यक्रममा छुट्टै इभेन्टको अध्यक्षता गर्दै उच्च स्तरीय बैठक सञ्चालन गरेको यो पहिलो पटक हो ।

यसैगरी, बैठकलाई संयुक्त राष्ट्रसंघका महासचिव एन्टोनियो गुटेरेसले विशेष सम्बोधन गरेका छन्, भने एन्डोराका प्रधानमन्त्री जेभियर इस्पोट जमोरा, काजिकिस्तानका विदेशमन्त्री जिन्बेक कुलुबायाभ र भुटानका स्टेट सेक्रेटरीले सम्बोधन गरेका छन् ।

बैठकमा नेपालदेखि अन्टार्कटिकासम्म देखिएको जलवायु परिवर्तनको असर र मानव जीवनमा यसले पारेको नकारात्मक प्रभावबारे आइसिसिआई, इसिमोड लगायतका अन्तर्राष्ट्रिय संस्थासङ्ग आवद्ध विषय विज्ञद्वारा प्रस्तुतिकरण गरिएको छ भने एफएओका महानिर्देशक डा. क्यू डोङ्यूले जलवायु परिवर्तनले कृषि तथा खाध प्रणालीमा पारेको प्रभावबारे चर्चा गर्नु भएको छ ।