काठमाडौं । नेपाल सुपर लिगमा झापा एफसीका समन्दार ओचिलोभले इन्जुरी समयको आठौं मिनेटमा गोल गरेपछि पोखरा थन्डर्स बराबरीमा रोकिएको छ ।

दशरथ रंगशाला शनिबार भएको खेलमा १० खेलाडीमा सीमित पोखराविरुद्ध १–० ले पछि परेको अवस्थामा अन्तिम समयमा गोल फर्काउँदै झापाले प्रतियोगिताको पहिलो अंक जोडेको छ ।

सातौं मिनेटमा पोखराका सुरज जिउ ठकुरीको क्रस झापाका गोलरक्षक स्टेफन कुपिचले बचाए । १० औं मिनेटमा झापाका फर्नान्डो टोरसको प्रहार पोखरा गोलरक्षक यभ्स प्रिसोले विफल पारे ।

११ औं मिनेटमा झापाका लक्ष्मण रूचाल गोल गर्न असमर्थ रहे । त्यसको एक मिनेटपछि लक्ष्मणले तारगेट हिट गर्न सकेनन् ।

१९ औं मिनेटमा मोसेस ग्याबाले गोल गरेपछि पोखराले सुरुवाती अग्रता बनाएको थियो । जोय एइडुले डी बक्सभन्दा बाहिरबाट मिलाएको पासमा मोसेले हेडमार्फत गोल गर्दै ब्रेक थ्रु दिलाए ।

३८ औं मिनेटमा झापाले अन्जल महर्जनले ह्याण्ड गरेको भन्दै पेनाल्टीको अपिल गरेको थियो । तर रेफ्रीले पेनाल्टी दिन अस्विकार गरेपछि आक्रोशित देखिएका लक्ष्मणलाई पहेँलो कार्ड देखाइएको थियो ।

पहिलो हाफको अन्त्यतिर पोखरा अग्रता दोब्बर बनाउनबाट चुक्यो । किपरसमेत अघि बढेको अवस्थामा पोखराका स्टेफेनले डी बक्सबाहिरबाट प्रहार गरेको बल सेकेन्डबारमा लागेर फर्कियो । रिबाउन्डमा झापाका खेलाडीले क्लियर गरेपछि खतरा टरेको थियो ।

४९औं मिनेटमा प्रदीप लामाको लामो दूरीको प्रहार पोस्टको माथिबाट बाहिरियो । ८९ औं मिनेटमा पोखराका कमलबहादुर थापाले रातो कार्ड पाएपछि पोखरा १० खेलाडीमा समेटिएको थियो ।

इन्जुरी समयको आठौं मिनेटमा ओचिलोभले गोल गर्दै खेलको नतिजा बराबरीमा समाप्त पारे । आवास लामिछानेको क्रस प्रिसोले पूर्ण रुपमा क्लियर गर्न नसक्दा उपलब्ध बलमा ओचिलोभले गल्ती गरेनन् ।

यस बराबरीसंगै ३ खेलमा ५ अंक जोडेको पोखरा दोस्रो स्थानमा उक्लिएको छ । प्रतियोगिताको पहिलो अंक जोडेको झापा सातौँ स्थानमा छ ।