काठमाडौं । नेपालकी एक धावकले इन्डोनेसियामा दौडेर एसिया ट्रेल मास्टर च्याम्पियन बनेकी छिन् । यसरी च्याम्पियन बन्ने नेपाली धावक हुन् रसिला तामाङ । उनी हङकङस्थित टी–८ कम्पनीको प्रायोजनमा इन्डोनेसिया पुगेकी थिइन् ।

आज (शनिबार) स्थानीय समय बिहान ६ बजे इन्डोनेसियाको सेन्ट्रल जाभास्थित सेकिपान तावाङमाङुबाट सुरु भएको प्रमुख उपाधिको दौडअन्तर्तग रसिलाले निर्धारित दूरी ७७ किलोमिटर १२ घन्टा २५ मिनेट ५२ सेकेन्डमा पूरा गरी विजयी भएकी हुन्।

त्यसैगरी बेल्जियमकी भन्ज नोप्सले १२ घण्टा ३२ मिनेट १६ सेकेन्डमा पूरा गरी दोस्रो र फिलिपिन्सकी एन्जेली काबालोले सो दूरी १४ घन्टा ३ सेकेन्ड ३७ सेकेन्डमा पूरा गरी तेस्रो स्थान बनाएकी थिइन् ।

सन् २०१४ देखि सञ्चालन भइरहेको यो प्रतियोगितामा रसिला पहिलो नेपाली विजेता हुन्।

इन्डोनेसियाबाट रसिला सोमबार नेपाल फर्कंदैछिन्।