काठमाडौं । प्रधानमन्त्री कप एकदिवसीय राष्ट्रिय प्रतियोगितामा नेपाल पुलिस क्लबले मधेश प्रदेशलाई ६ विकेटले पराजित गर्दै लगातार पाँचौं जित निकालेको छ ।

मधेश प्रदेशले दिएको ९७ रनको सामान्य लक्ष्य पछ्याएको पुलिसले १८.३ ओभरमा ४ विकेट गुमाउँदै पूरा गर्‍यो ।

लगातार पाँचौं जितसँगै पुलिसको फाइनल खेल्ने सम्भावना बलियो बनेको छ ।

पुलिसका लागि सुनिल धमलाले २७ बलमा ३ चौका र २ छक्कासहित २८ रन बनाए ।

त्यस्तै कुशल भुर्तेलले २३ बलमा २ चौका र १ छक्कासहित १९, अर्जुन साउद ७, दीलिप नाथ ४, अमित श्रेष्ठ १५ र आरिफ शेख १६ रन बनाए ।

मधेशका अरनिको यादव र रञ्जित कुमारले २–२ विकेट लिए ।

त्यसअघि माथिल्लो मूलपानी क्रिकेट मैदानमा टस हारेर पहिला ब्याटिङको निम्तो पाएको मधेश २४ ओभरमा ९६ रनमा अल आउट भएको थियो ।