‍‍‍‍‍‍‍‍‍‍‍‍‍काठमाडौं । देशका विभिन्न स्थानमा ८ जना मृत अवस्थामा फेला परेका छन् ।

प्रहरीका अनुसार सिरहाको नरहा गाउँपालिका-२ पानवारीस्थित हिमालय सुगर मिलको कम्पाउण्डभित्र चालकहरु सुत्ने टिनको टहरामा ट्रयाक्टरमा उखु लिएर आएका ट्याक्टर चालक कर्जन्हा नगरपालिका-११ बस्ने २७ वर्षीय अशोक दास मंगलबार मृत अवस्थामा फेला परेका छन् ।

यस्तै मोरङ, विराटनगर महानगरपालिका-१३ जतुवा नहर छेउस्थित खाली गुम्तीमा विगत ३/४ वर्ष देखि मागी खाई बस्ने भारत हरिपुर घर भएका ४५ वर्षीय संजय पासवान नाम बताउने पुरुष गुम्तीमै मंगलबार मृत अवस्थामा फेला परेका छन् ।

यसैगरी मोरङ, बेलबारी नगरपालिका-२ स्थित बाटोको छेउमा लेटाङ नगरपालिका-१ अँधेरी घर भएका ६३ वर्षीय अकले तामाङ गएराति मृत अवस्थामा फेला परेका छन् ।

दाङ, घोराही उपमहानगरपालिका-३ झिंगनी बस्ने ५७ वर्षिय छुन्ना चौधरी बबई पुल नजिक पानीमा मंगलबार मृत अवस्थामा फेला परेका छन् ।

ललितपुर, ललितपुर महानगरपालिका-४ जावलाखेलस्थित पाटीमा काठमाडौं साँखु घर भएका ५५ वर्षीय कृष्ण तामाङ मंगलबार मृत अवस्थामा फेला परेका छन् ।

काभ्रे, पाँचखाल नगरपालिका-२ अनेकोट जलढुङ्गा बस्ने ४० वर्षीया सुक्रा मिजार सोही ठाउँस्थित जलढुङ्गाको खोल्सामा मंगलबार मृत अवस्थामा फेला परेकी छन् । माघ १० गते बेलुका घरबाट हिँडेकी उनको खोजी गर्ने क्रममा शव फेला परेको हो ।

पाल्पा, रैनादेवी छहरा गाउँपालिका-१ सिद्धेश्वर अर्चले बस्ने ६३ वर्षीय रेवतिराम अर्याल आफ्नै घरको बरन्डामा मंगलबार मृत अवस्थामा फेला परेका छन् ।

सिन्धुपाल्चोक, चौतारा साँगाचोक गढी नगरपालिका-२ बतासे बस्ने ४३ वर्षीय राजु भन्ने प्रेम बहादुर थापा सोही नगरपालिका-२ भोटेफुल्पिङ बस्ने आईते लामाको मानिस बसोवास नगरेको घरको पिँडिमा मंगलबार मृत अवस्थामा फेला परेका छन् ।

यस सम्बन्धमा प्रहरीले आवश्यक अनुसन्धान गरिरहेको छ ।