म्याग्दी(बेनी)। पर्वतको जलजला गाउँपालिका–७ धाइरिङ मिलनचोकका युवा किसान दीपक शर्मालाई विदेश जाने सोच नआएको पनि होइन् । गाउँका साथिभाइहरु रोजगारको लागि विदेश जान थालेपछि शर्माले पनि राहदानी बनाएका थिए । तर जब विदेश पुगेका साथिहरुले प्रवासमा पनि पैसा कमाउने संघर्षको दुख सुनाए तब शर्माले पनि विदेश जान बनाएको राहदानी बाकसमा थन्काएर स्वदेशमै आत्मनिर्भर बन्न कृषि पेशालाई अंगालेका थिए ।

पौरखी किसान शर्माले व्यवसायिक ताजा तरकारी उत्पादन गरेर राम्रो आम्दानी गर्दै आएका छन् । कुनै समय विदेश जान राहदानी समेत बनाएका किसान शर्मा अहिले भने गाउँका अन्य युवाहरुमाझ समेत जिविकोपार्जन र घरखर्च चलाउनकै लागि विदेश पलायन हुनुपर्दैन भन्ने उदाहरण बनेका छन् । विदेश गएकाहरुले समेत पैसा कमाउन सहज नभएको खवर सुनाउँदा कृषक शर्मा स्वदेशमै घरपरिवारसंग बसेर आफ्नै गाउँठाउँमा खेतवारीमा पसिना बगाएर आत्मनिर्भर बन्न पाउँदा खुसी छन् ।

बुबा आमाले अंगालेको निर्वाहमुखी परम्परागत कृषि पेशालाई व्यवसायिक बनाउँदै दीपक र उनको श्रीमती सीता शर्मा अहिले गाउँपालिकाकै अगुवा र सफल किसानको रुपमा परिचित छन्। खेतबारीमा तरकारी फलाउने र बिक्रि गर्ने दैनिकी अंगाल्नुभएका शर्मा दम्पती कृषि पेशाबाट सन्तुष्ट छन् । स्वदेशमा माटोमा पसिना बगाएर तरकारी फलाउन र पैसा कमाउन सकिन्छ भन्ने उदाहरण बनेका शर्मा दम्पती रोजगारका लागि विदेश पलायन नै हुनपर्छ पछिल्लो प्रचलनलाई चिर्न सफल भएका छन् ।

शर्माले अहिले मिलनचोकमा आफ्नै र म्याग्दीको बेनी नगरपालिका–१ लामाबगरमा पाँच रोपनी भाडाको जग्गा समेत गरेर १२ रोपनी क्षेत्रफलमा तरकारी लगाएका छन् । हिउँदका समयमा १५ रोपनी सम्ममा तरकारी लगाउने उनले बताए । तरकारी खेतीबाट बार्षिक रु ९ लाख सम्म विक्रि गर्ने र खर्च कटाएर ७ लाखसम्म नगद आम्दानी हुने उनको अनुभुती छ ।

हरेक विहान देखि अवेर शर्मा दम्पत्ती तरकारी खेतीको काममा व्यवस्त हुन्छन् । ३८ वर्षीय दीपकले कृषि पेशामा परिश्रम गरे राम्रो आम्दानी लिन सकिने अनुभव सुनाए । लामाबगर स्थित करिब ७ रोपनी खेत वार्षिक रुपमा एकलाख २० हजार रकम बुझाउने गरी जग्गा भाडामा लिनुभएका शर्मा दम्पत्तीले काँक्रो,सिमी,बोडी,भेन्टी,लौका,करेला,घिरौला, र खुर्सानी लगायतका बेमौसमी तरकारी फलाएका छन् । उत्पादन भएको ताजा तरकारी लिन बेनीका व्यवसायीहरु घरमै आउने भएकाले बजारको अभाब नभएको उनको भनाई छ ।

कृषि पेशामा धेरै दुःख पनि छ,कमाई पनि छ । आफ्नै माटोमा पसिना बगाउन पाउँदा खुसी र गौरबको अनुभुति हुने उनको भनाई छ । कृषि पेशाबाट भएको आम्दानीले शर्मा परिवारले सजिलै घरखर्च चलाएका छन् । घरमै कृषि पेशा गर्दा परिवार छुटिएर र टाढीएर बस्नुपर्ने अवस्था नआउने भएकाले आफुहरुले यहि पेसालाई निरन्तरता दिने दिपकको श्रीमती सीताको भनाई छ ।

तरकारी बिक्रीको रकमबाट परिवारको जीविका चल्नाका साथै छोराछोरीको पढाइ खर्च,औषधि उपचार र छरछिमेकलाई समस्या पर्दा सरसापट दिन सक्ने र केही रकम बचत समेत गर्ने समेत शर्मा दम्पती सफल भएका छन् । विभिन्न समयमा सरकारी निकायबाट पाउने तालिम र अनुदानले उनीहरुलाई कृषि पेशामा थप सक्रिय भएर लाग्न हौसला दिने गरेको छ ।
आफूले अंगालेको कृषि पेशा छोरा बुहारीले निरन्तरता दिएर बुढसकालको साहरा बनेकोमा शर्माका बुबा आमा पनि खुसी छन् । छोरा दिपकले आफ्ना आमा बुबाले गरेकै कृषि पेसालाई व्यावसायिक र आधुनिकीकरण गरेका छन् ।

छोराबुहारीले उन्नत तवरले गरेको कृषि खेतीले आफुहरुलाई सन्तोष मिलेको आमा भद्रकली शर्मा बताउँछन् ।
युवाहरु रोजगारका लागि विदेश पलायन हुने क्रमले गाउँघरमा कतिपय घरहरुमा बृद्धबृद्धाहरु एक्लै बस्नुपर्ने बाध्यता आएको समयमा पौरखी शर्माको परिवारभने खुसीसाथ एकसाथ आत्मनिर्भरका साथ बसेका छन् ।

छोरा बुहारीले खेतवारीमा खेतिको काम गर्ने र बृद्ध आमा बुबा घरधन्दाको काम गर्ने शर्मा परिवारको दैनिकी रहरलाग्दो छ । तरकारी खेतीबाट भएको आम्दानीले शर्मा परिवारको आर्थिक अवस्थामा समेत सुधार भएको छ ।