काठमाडौं। प्रतिनिधि सभाको राज्य व्यवस्था एवं सुशासन समितिले गृहमन्त्री रमेश लेखकसँग चैत १५ गतेको तीनकुने घटनाबारे जानकारी लिने भएको छ।

बुधबार सिंहदरबारमा बसेको समिति बैठकमा सांसदहरूले राजावादी समूहको प्रदर्शनका क्रममा भएको जनधनको क्षतिबारे सत्तापक्ष र प्रतिपक्षी दलका सांसदहरूले गृहमन्त्रीको जवाफ माग गरेका थिए।

राजावादी समूहको प्रदर्शनबारे जवाफ दिन गृहमन्त्री शुक्रबारको समिति बैठकमा उपस्थित हुने समिति सभापति रामहरि खतिवडाले जानकारी दिए।

चैत १५ गते तीनकुनेमा राजावादी समूहले गरेको प्रदर्शनको क्रममा २ जनाको मृत्यु भएको थियो। साथै प्रदर्शनकारीले निजी सम्पत्ति तोडफोड र आगजनी गरेका थिए।