काठमाडौँ। अनेरास्ववियुमा एमालेले ३२ बर्षे उमेर हद लगाएपछि संगठनमा दोस्रो तहका नेताहरु नेतृत्वको दौडमा छन् ।

३२ बर्षे उमेर हदका कारणले अहिलेका पदाधिकारीमध्ये चार जना मात्र नेतृत्वका लागि योग्य हुने छन् । सचिव प्रकाश पौडेल, डा. सुजन कडरिया, दीपक धामी, अन्जना सिवाकोटी र आरती भट्टराई नयाँ नेतृत्वका लागि योग्य रहेका छन् । तिमध्ये अहिलेसम्म कसैले पनि उम्मेदवारी घोषणा गरेका छैनन् । तर पदाधिकारी बाहेकका अन्य अखिलका नेताहरुले भने उम्मेदवारी घोषणा गरिसकेका छन् । तिमध्ये एक हुन् अखिलका केन्द्रीय सदस्य तथा शिक्षा विभाग उपप्रमुख शरद पोखरेल ।

प्युठानको सुन्दर गाउँ बेलबासबाट यात्रा सुरु गरेका पोखरेल अहिले अनेरास्ववियुको अध्यक्ष पदमा सशक्त दाबी गर्दै अगाडि बढिरहेका छन् । त्रिचन्द्र क्याम्पसमा विद्यार्थी राजनीतिमा क्रियाशील पोखरेलले अहिले अखिलको अध्यक्षको उम्मेदवारी घोषणा गरिसकेका छन् ।

त्रिचन्द्रमा उनलाई ‘आन्दोलनको बाघ’ उपनाम चिनिने पोखरेले यहि जेठ २५ गतेदेखि २८ गतेसम्म हुने अनेरास्ववियुको २४ औं महाधिवेशनका लागि उम्मेदवार घोषणा गरेका हुन् । आफूले विद्यार्थी आन्दोलनको नेतृत्व गर्ने, युवाको आवाजलाई बुलन्द बनाउने र नीति निर्माणमा विद्यार्थीको पक्ष प्रस्तुत गर्ने उनी बताउँछन् ।

उनले विद्यार्थीको विदेश पलायन रोक्ने, स्वदेशमै अवसर सिर्जना गर्ने, र शिक्षालाई जनताको पहुँचमा पु¥याउने प्रतिवद्धता व्यक्त गरेका छन् ।

महाधिवेशनले १५१ नयाँ कमिटी चयन गर्नेछ ।