विराटनगर । मोरङ कारागारमा थुनामा रहेकी एक महिला मृत अवस्थामा भेटिएकी छन् ।

सुनसरीको बराहक्षेत्र नगरपालिका–६ की ३२ वर्षीया राधा भट्टराई बुधबार बिहान कारागारको महिला सेलमा रहेको शौचालयभित्र मृत अवस्थामा भेटिएकी हुन् ।

उनलाई कर्तव्यज्यान मुद्दामा सुनसरी जिल्ला अदालतले जन्मकैद सजाय सुनाएको थियो । ०८० साल माघ ५ गतेदेखि उनी मोरङ कारागारमा थुनामा थिइन् ।

राधा आफ्ना दुई नाबालक सन्तानसहित सप्तकोसी नहरमा हामफालेकी थिइन् । उनीसहित एक सन्तानको उद्धार गरिएको थियो । अर्को सन्तानको ज्यान गएको थियो । त्यसपछि उनीविरुद्ध कर्तव्य ज्यानको आरोपमा मुद्दा चलाइएको थियो ।