काठमाडाैं । राष्ट्रिय स्वतन्त्र पार्टी (रास्वपा) र काठमाडौं महानगरपालिकाका मेयर बालेन शाह पक्षबीच एकताकाे विषयमा लगभग सहमति जुटेकाे छ । दुई पक्षबीच सहकार्य गर्ने लगभग सहमति भए पनि अन्तिम टुंगो भने लाग्न नसकेकाे नेताहरुले जानकारी दिएका छन् ।

स्राेतका अनुसार शुक्रबार बिहानबाट रास्वपाका शिशिर खनाल, असिम शाह र बालेनका तर्फबाट कुमार बेन र भुपदेव शाहबीच छलफल भएको थियो । छलफलमा केही कुरामा सहमती जुटेकाे तर अन्तिम टुंगाे लाग्न भने बाँकी रहेकाे बताइएकाे छ । के के विषयमा सहमति जुट्यो भन्नेबारे खुलाएकाे भने छैन।

जानकारी अनुसार रास्वपा सभापतिमा रवि लामिछाने नै रहने र मेयर बालेनलाई उपसभापतिसँगै प्रधानमन्त्रीको उम्मेदवार बनाउने प्रस्ताव गरिएको छ । वार्ता समितिका बीचमा लगभग सहमति जुटेको तर त्यसलाई अन्तिम रूप दिने विषय भाेलि टुंगो लाग्ने स्राेतकाे भनाइ छ ।

रवि, बालेन सहमतिमा उज्यालो नेपाल पार्टीका अवधारणाकार कुलमान घिसिङलाई समेत समेट्नेबारे छलफल भइरहेको बुझिएको छ ।