गण्डकी। पोखरा महानगरपालिकाको १८औँ नगरसभाले पुस मसान्तसम्म तोकिएको कर छुटको समयावधिलाई आगामी चैत मसान्तसम्म विस्तार गरेको छ।

राजस्व सङ्कलन प्रणालीमा देखिएको समस्याका कारण सेवाग्राहीहरू मर्कामा पर्न सक्ने अवस्थालाई ध्यानमा राख्दै नगरसभाले उक्त निर्णय गरेको हो।

चालु आर्थिक वर्षमा पुस मसान्तभित्र कर बुझाउने करदातालाई १० प्रतिशत छुट दिने व्यवस्था आर्थिक ऐनमा रहे पनि प्रणालीगत समस्याका कारण कर तिर्न आएका सर्वसाधारण फर्किनुपर्ने अवस्था आएको महानगरका सूचना अधिकारी कृष्णप्रसाद तिवारीले जानकारी दिएका छन्।

उनका अनुसार सेवाग्राहीले चाहेर पनि राजस्व सङ्कलन प्रणालीमा आएको समस्याका कारण कर तिर्न नसकेको भन्दै कर छुटको समयावधि चैत मसान्तसम्म बढाइएको हो।

यसअघि प्रणालीमा देखिएको समस्याका कारण सेवाग्राही प्रभावित भएको भन्दै वडा नम्बर १३ का वडाध्यक्ष किरण बरालले छुटको समयावधि थप्न माग गर्दै ध्यानाकर्षणपत्र बुझाएका थिए।