मोरङ। मोरङको बिराटनगरका सशस्त्र प्रहरी बलका चारजना डिआईजी र भारतको सशस्त्र सीमा बल (एसएसबीका) पाँचजना डिआइजी आजबाट छलफलमा जुटेका छन् ।

दुइदिन सम्म चल्ने बैठकमा सशस्त्र प्रहरीका कोशी , मधेस, बागमतीर गण्डकी प्रदेशका डिआइजीहरु सहभागी छन् भने भारतर्फका यी चार प्रदेशसँग सीमा जोडिएका पश्चिम बंगाल र बिहारका एसएसबीका पाँचजना डिआईजी सहभागी छन् ।

आउँदो फागुन २१ गते हुन गइरहेको नेपालको निर्वाचनलाई लक्षित गर्दै यो बैठक डाकिएको सशस्त्र प्रहरी बलका एक डिआईजीले मेरोन्यूजलाई जानकारी दिए । बैठकमा विशेषत निर्वाचन अवधीमा खुलासीमाको फाइदा अपराधिक तत्वहरुले नउठाउन भन्ने पक्षमा आवश्यक रणनिती र योजना बनाईने छ ।

त्यस्तै जेनजी आन्दोलनका क्रममा लुटिएका हतियार र जेलबाट भागेका कैदी निर्वाचनमा दुरुपयोग रोक्न समेत दुई पक्षबीच छलफल हुनेछ । निर्वाचनलाई शान्तिपूर्णरुपमा सम्पन्न गर्न निर्वाचन अवधिभर सिमामा निगरानी , गस्ती , पेट्रोलिङ, सतर्कता बढाइदिन नेपालीपक्षले एसएसबीलाई आग्रह गर्नेछ ।

त्यसका लागि एसएसबीको विशेष सहयोगको अपेक्षा आफुहरुले गरेको नेपाली पक्षको भनाइ छ । यस अघी गत असोजमा निर्वाचनका क्रममा भारतको बिहार प्रदेशसँग सिमा जोडिएका नेपालका पाँच प्रदेशका सशस्त्र प्रहरी बलका डिआइजी बिहारमा भेला भएका थिए ।

बिहारसँग सिमा जोडिएका कोशी प्रदेश, मधेस, बागमती , गण्डकी र लुम्बिनी प्रदेशका सशस्त्र प्रहरीका डिआइजी बिहार प्रदेश सरकार त्यहाँको एसएसबीको निमन्त्रणामा बिहारमा भेला भएकाेमा नेपालको सन्दर्भमा यसपटक त्यसैगरी भारतीय पक्षलाई निर्वाचनका लागि आमन्त्रण गरेर छलफल गरिएको हो ।