ढाका। बंगलादेशको १३औं राष्ट्रिय संसदीय निर्वाचनमा बीएनपीका अध्यक्ष तारिक रहमान विजयी भएका छन्। उनलाई ढाका-१७ र बोगुरा-६ निर्वाचन क्षेत्रबाट विजयी घोषित गरिएको छ। उनले ढाका-१७ बाट ७२,६९९ मत पाएका छन्, 

जसमा उनका निकटतम प्रतिद्वन्द्वीले ६८,३०० मत पाएका थिए र यही आधारमा उनी ४,३९९ मतको अन्तरले जिते । त्यस्तै बोगुरा-६ मा उनी २१६,२८४ मतसहित भारी मतान्तरले विजयी भए, जहाँ उनका नजिकको प्रतिद्वन्द्वीले ९७,६२६ मत प्राप्त गरे । यी नतिजा निर्वाचन अधिकृतले  घोषणा गर्न बाँकी छन् । 

उनी दुवै क्षेत्रमा बङ्गलादेश राष्ट्रवादी पार्टीको चुनावी चिन्ह धानको ढेलो साथमा उम्मेदवार थिए । मतदान शान्तिपूर्ण रूपमा सम्पन्न भएको रिपोर्ट भएको छ ।

बंगलादेशले ३५ वर्षपछि पुरुष प्रधानमन्त्री पाउने लगभग निश्चित भएको हो। यसअघि सन् १९८८ मा काजी जफर अहमद प्रधानमन्त्री बनेपछि सन् १९९१ देखि २०२४ सम्म बंगलादेशको राजनीतिमा शेख हसीना र खालिदा जियाको प्रभाव कायम रह्यो। यस अवधिमा उनीहरू पालैपालो प्रधानमन्त्री बन्दै आएका थिए।

शेख हसीनाले देश छाडेपछि र खालिदा जियाको निधनपछि भएको यो पहिलो निर्वाचन हो। शेख हसीनाको पार्टी अवामी लिगलाई यस निर्वाचनमा सहभागी हुन अनुमति दिइएको थिएन। निर्वाचन आयोगका अनुसार सन् २०२४ मा भएको विद्यार्थी आन्दोलनका क्रममा भएको हिंसामा पार्टीको संलग्नता रहेको आरोपका कारण यस्तो निर्णय लिइएको हो।

भारतमा बसिरहेकी पूर्व बंगलादेशी प्रधानमन्त्री शेख हसीनाले भने यस निर्वाचनलाई पूर्ण रूपमा फर्जी र असंवैधानिक भन्दै आलोचना गरेकी छन्। उनले मोहम्मद युनुसले गैरकानुनी तथा असंवैधानिक तरिकाबाट सत्ता कब्जा गरी त्यही आधारमा चुनाव गराएको आरोप लगाएकी छन्।