काठमाडौं । आईसीसी टी–२० विश्वकप क्रिकेटको आयोजक श्रीलंका सुपर आठमा प्रवेश गरेको छ । सोमबार राति भएको खेलमा श्रीलंकाले अस्ट्रेलियालाई ८ विकेटले हराएको हो ।
सुरुमा ब्याटिङ गरेको अस्ट्रेलियाले दिएको १८२ रनको लक्ष्य श्रीलंकाले मात्र दुई विकेटको क्षतिमा १२ बल बाँकी हुँदा १८४ रन बनाएर भेट्टाएको हो ।

यसैगरी, श्रीलंकाले तीन खेलमा लगातार जित निकाल्दै ६ अंक जोडेको छ । दुई खेलमा खेलेको जिम्बाबेले चार अंक जोड्दा तीन खेल खेलिसकेको अस्ट्रेलियाले दुई अंक मात्र बनाएको छ ।सुपर आठ प्रवेश गर्न समूह ‘बी’बाट अस्ट्रेलियाले अन्तिम खेल जित्नैपर्ने दबाब छ । अस्ट्रेलियाको अघिल्लो चरण सुरक्षित गर्न जिम्बाबेले बाँकी दुई खेल ठुलो अन्तरमा गुमाउनुपर्ने देखिन्छ । यसरी हेर्दा समूह ‘बी’बाट सुपर आठ प्रवेशका लागि जिम्बाबेलाई सजिलो देखिन्छ ।

समूह ‘ए’बाट भारत यसअघि नै सुपर आठमा प्रवेश गरिसकेको छ । भारत एक खेल अगाडि नै सुपर आठ प्रवेश गरेको हो । यो समूहबाट सुपर आठको प्रतिस्पर्धामा अमेरिका र पाकिस्तान छन्।पाकिस्तानले अन्तिम खेल गुमाएमा अमेरिका सुपर आठ प्रवेश गर्नेछ। नामिबियासँगको खेलमा पाकिस्तान विजयी भए ६ अंक बनाउँदै सुपर आठ प्रवेश गर्नेछ ।

समूह ‘सी’बाट वेस्ट इन्डिज र इंग्ल्यान्ड सुपर आठ प्रवेश गरिसकेका छन् भने समूह ‘डी’बाट दक्षिण अफ्रिका सुपर आठमा प्रवेश गर्दा न्युजिल्यान्ड र अफगानिस्तान अझै सुपर आठको दौडमा छन् ।