काठमाडौं । रास्वपाका सभापति रवि लामिछानेले पूर्वसभामुख देवराज घिमिरेको सभामुख कार्यकाललाई लिएर टिप्पणी गरेका छन् । झापा २ मा पुगेका लामिछानेले घिमिरेले सभामुख हुँदा ‘बा’ को आदेश मानेर जनताको आवाज उठाउँदा माइक काटेको आरोप लगाए ।

रविले भने, ‘मलाई थाहा छैन, पूर्वसभामुख कुन मुख बोकेर भोट माग्दै हुनुहुन्छ । हामीले जनताको पक्षमा बोल्दा, नेपाली जनतालाई भिजिट भिसामा लाखौँ रूपैयाँ ठग्नेलाई कारबाही गर, आयोग बनाऊ, समिति बनाऊ भन्यौँ । हामीले जनताको आवाज बोल्यौँ । तर, कुन मुखले भोट माग्दै हुनुहुन्छ सभामुख, त्यो माइक काटिदिनुभयो । मैले रास्वपालाई गर्नुभएको व्यवहारको कुराकानी गरेको होइन । हामीले नेपाली जनताको आवाज उठाएका थियौँ । नेपाली जनता प्रत्येक दिन एयरपोर्टमा बेचिँदै थिए ।’

उनले संसदमा रास्वपाका २१ जना सांसदलाई गलहत्याएर बाहिर निकालिएको घटना स्मरण गर्दै जनताको आवाज दबाउन खोजिएको आरोप लगाए ।

आफ्नो सांसद पद गुमेको सन्दर्भ जोड्दै लामिछानेले भने, ‘संसद नियमावलीले थुनामा नरहेको मान्छेको पद निलम्बन हुँदैन भन्छ, तर उहाँलाई बाको आदेश जनताको आदेशभन्दा ठूलो भयो । दुई घण्टामा सूचना टाँसेर मलाई गलहत्याएर संघीय संसदबाट निकालियो, तर जनताको मनबाट निकाल्न सक्नुभएन ।’