इटहरी । राष्ट्रिय स्वतन्त्र पार्टीका वरिष्ठ नेता तथा पार्टीको तर्फबाट भावी प्रधानमन्त्रीका उम्मेदवार बालेन्द्र शाहले नेपालको स्थानीय उत्पादनले बजार पाउनुपर्नेमा जोड दिएका छन् ।

आज रास्वपाले इटहरीमा आयोजना गरेको परिवर्तन उद्घोष सभालाई सम्बोधन गर्दै उनले तरकारी पारीको (भारत) को खानुपरेको भन्दै अब पूर्वी पहाडका उत्पादनले बजार पाउनुपर्ने बताएका हुन् ।

सम्बोधनको सुरुमै चिया इलाम र दमकको पिएको भएपनि तरकारी कहाँको खानुभएको हो भनेर स्थानीयवासीलाई प्रश्न सोधे। ‘चिया पिउनुभयो ? चिया कुन ठाउँको पिउनुभयो ? इलाम दमकको चिया,’ बालेनले प्रश्न गर्दै भने, ‘खाना खानुभयो ? बिहान खानाका तरकारी कहाँको खानुभयो ? बोर्डर पारीको खानुभयो ।’

तेह्रथुम र पाँचथरमा उत्पादन भएको तरकारी इटहरीवासीले खान नपाउनु दुःखको कुरा भएकाे बताए ।

पहाडमा तरकारी कुहिएर जाने तर तराईका भान्सामा भारतीय तरकारी पाक्नुपर्ने अवस्थालाई समाधान गर्नुपर्नेमा उनले जोड दिए। ‘यो दुःखको कुरा हो। यो सप्लाई चेनको समस्या समाधान गर्नुपर्छ र त्यो समाधान गर्ने पार्टी बन्न चाहन्छ रास्वपा,’ उनले भने।

पूर्वलाई कृषि उत्पादनको हब मानिए पनि यहाँका जनताले आफ्नै माटोको स्वाद लिन नपाएकोमा बालेनले चिन्ता व्यक्त गरे। उनले पूर्वी तराईका ३-४ वटा जिल्लाले मात्रै सही ढंगले खेती गर्ने हो भने सिंगो देशलाई पुग्ने धान र चामल उत्पादन गर्न सक्ने क्षमता राख्ने बताए।