काठमाडौँ । राष्ट्रिय स्वतन्त्र पार्टी (रास्वपा) को आज केन्द्रीय समिति बैठक आह्वान भएको छ । बैठकमा छलफल गरिने नौबुँदे प्रस्ताव आइतबार नै पार्टीले सार्वजनिक गरिसकेको छ ।

प्रवक्ता मनिष झाका अनुसार, बैठकमा संगठनात्मक, नीतिगत तथा विधानसम्बन्धी महत्वपूर्ण विषयहरूमा छलफल हुने छ । बैठकको सुरुवात पार्टी गतिविधिबारे विस्तृत व्रिफिङबाट हुने कार्यसूचीमा बनाइएको छ । केन्द्रीय सदस्यहरूको रिपोर्टिङमा २० जनाले दुई–दुई मिनेट बोल्न पाउने भनिएको छ ।

बैठकमा केन्द्रीय समिति पदाधिकारी मनोनयनको विषय पनि प्रमुख एजेन्डाका रहेको रास्वपाले जनाएको छ । आगामी महाधिवेशनलाई लक्षित गर्दै कार्यविधि मस्यौदामाथि छलफल गरिने र पार्टी विधान संशोधनसम्बन्धी विषयमा पनि निर्णय लिइने तयारी छ ।

स्थानीय तह निर्वाचनलाई ध्यानमा राख्दै उम्मेदवार क्लब गठन तथा आवेदन आह्वानसम्बन्धी प्रस्ताव पनि कार्यसूचीमा छ । त्यस्तै, विदेशमा रहेका नेपालीलाई प्रवासबाटै मताधिकार दिने विषयमा पनि छलफल हुने जनाइएको छ ।