संयुक्त अरब इमिरेट्स (युएइ)माथी मंगलबार इरानले मिसाइल र ड्रोन आक्रमण गरेको छ । यो आक्रमण अमेरिका र इरानबीच भएको पछिल्लो युद्धविरामपछि इरानबाट भएको पहिलो ठूलो आक्रमण मानिएको छ, जसले क्षेत्रीय तनाव पुनः चर्काएको छ।

मिसाइल तथा ड्रोन आक्रमणका कारण फुजैराह तेल क्षेत्र नजिक आगलागी भएको रिपोर्ट छ। कम्तीमा ३ जना घाइते भएका छन् जसमा भारतीय नागरिकहरू समेत रहेको विवरणहरु आएका छन्। केही जहाज र ऊर्जा पूर्वाधारमा क्षति पुगेको बताइएको छ ।
युएइले इरानले प्रक्षेपण गरेका १५ वटा मिसाइल (१२ बलिस्टिक र ३ क्रुज) तथा ४ वटा ड्रोनलाई हवाई रक्षा प्रणालीले सफलतापूर्वक खसालिएको जनाएको छ।

हालसम्म इरानले यस घटनाबारे औपचारिक स्पष्ट टिप्पणी दिएको छैन । इरानका विदेशमन्त्री अब्बास अर्घाचीले अमेरिका र युएइलाई कडा चेतावनी दिएका छन् कि उनीहरू वर्तमान द्वन्द्वमा थप गहिरो रूपमा संलग्न हुँदा “दलदल” मा फस्न सक्छन्।

उनले ट्विटरमा लेख्दै भने ‘ क्षेत्रमा भइरहेका घटनाले देखाउँछ कि यो संकटको सैन्य समाधान सम्भव छैन । अमेरिका र युएइले “गलत प्रभाव” का कारण पुनः ठूलो द्वन्द्वमा तानिन सक्ने खतरा छ ।’