काठमाडौं । अमेरिकी सहयोग परियोजना एमसीसीको विरोधमा बुधबार बेलुका काठमाडौंसहित देशैभर मशाल जुलुस प्रदर्शन भएका छन् ।

काठमाडौंको नयाँ बानेश्वर क्षेत्रमा सत्तारुढ नेकपा माओवादी केन्द्रका विद्यार्थीहरुले मशाल जुलुस निकालेका थिए भने अन्य ठाउँमा नेकपा (विप्लव)सहित ६ कम्युनिस्ट पार्टीले मशाल जुलुस निकालेका छन् ।

काठमाडौंका छुट्टाछुट्टै पाँच ठाउँबाट मशाल जुलुस निकालेको एमसीसीविरुद्ध पाँच दिने आन्दोलन घोषणा गरेका विप्लव–वैद्यसहितका ६ दलले जनाएका छन् । ६ कम्युनिस्ट पार्टी र दुई मोर्चाले अहिले बेलुका काठमाडौं उपत्यकाको चावहिल, भक्तपुरको कमलविनायक, ललितपुरको लगनखेल, बागबजार र कलंकीमा मशाल जुलुस प्रदर्शन गरेका थिए ।

एमसीसीविरुद्ध नारा लगाउँदै मसाल जुलुस निकालिएको थियो ।

एमसीसी प्रस्ताव संसदमा टेबल गरी भोलिदेखि छलफल गरी अनुमोदन गराउन लागिएको भन्दै ६ कम्युनिस्ट पार्टीले आजदेखि ५ दिने आन्दोलन घोषणा गरेका छन् ।

आन्दोलनको कार्यक्रम अन्तर्गत आज बेलुका देशैभर मशाल जुलुस तथा भोलि देशभरको जिल्ला प्रशासन कार्यलय घेराउ तथा काठमाडौंमा संसद भवन घेराउको कार्यक्रम रहेको छ ।

आइतबार विरोधकाबीच प्रतिनिधिसभामा पेश गरिएको एमसीसी सम्झौता सम्बन्धि प्रस्तावमाथि भोलिदेखि छलफल हुँदैछ ।

विहीबार दिउँसो १ बजे बोलाइएको प्रतिनिधिसभाको बैठकमा अर्थमन्त्री जनार्दन शर्माले एमसीसी सम्झौताबारे छलफलको प्रस्ताव गर्ने कार्यसूची रहेको संघीय संसद सचिवालयले जनाएको छ ।