काठमाडौं । नेपाली कांग्रेसको सुभेच्छुक संस्था नेपाल सांस्कृतिक संघमा अध्यक्ष तीर्थ थापाले विधानविपरित कार्यसमिति विस्तार गरेको भन्दै बदरको माग गरिएको छ ।

सांस्कृतिक संघकै पूर्वसहमहामन्त्री र केन्द्रीय सदस्यहरूले नयाँ कार्यसमिति विस्तार गैरकानूनी भएको भन्दै छानबिन गरी आवश्यक कारवाहीको माग गरेका हुन् ।

अध्यक्ष थापाले गैरसांस्कृतिक र विधान बमोजिम योग्यता नपुगेका व्यक्तिहरूलाई संघमा मनोनयन गरेकोले छानविन गरी आवश्यक कारबाही गर्न भन्दै पूर्वमहामन्त्री कुलचन्द्र सुवेदी, पूर्वसहमहामन्त्री सुष्मा कार्कीसहित नौ जनाले पार्टी केन्द्रीय कार्यालयमा निवेदन दिएका छन् ।

अध्यक्ष थापाले विधानविपरीत कार्यसमिति विस्तार गरेको भन्दै बदर र कारबाहीको माग गर्दै निवेदन दिनेहरू संघका पूर्वकेन्द्रीय सदस्यहरू राजेन्द्र केसी, दिलीप गौतम, योगेन्द्र श्रेष्ठ, लिलाधर भट्टराई, टाइम कट्टेल, तारा भण्डारी र मदन थापा पनि छन् ।

थापाले विगत १६ वर्षदेखि संघमा एकलौटी ढंगले चल्दा आफुहरू अन्यायमा परेको भन्दै उनीहरूले निवेदन दर्ता गराएका हुन् ।

एकलौटी रुपमा सभापति रहेर थापाले एकाधिकार रुपमा संघको प्रस्तावना र भावनाविपरित कार्य गर्दै आएको निवेदनमा भनिएको छ ।

विधानले तोकेको समयवधि सकिएको एक वर्षपछि पनि मनोमानी ढंगले कार्यसमिति विस्तार गरेकाले आफुहरू अन्यायमा परेको भन्दै निवेदकहरूले न्यायको माग गरेका छन् ।

अध्यक्ष थापाले संघलाई खल्तीबाट चलाएको भन्दै उनीहरुले तत्काल विधानसम्मत ढंगले अधिवेशन गर्न माग गरेका छन् ।