काठमाडौँ । प्रहरी महानिरीक्षक (आईजीपी) धीरजप्रताप सिंहले स्थानीय तह निर्वाचनमा विनियोजित बजेट नियमानुसार कार्यक्रम सञ्चालन भए/नभएबारे सुक्ष्म र वस्तुनिष्ठ अनुगमन तथा मूल्यांकन गर्न आठ अनुगमन टोलीलाई निर्देशन दिएका छन् ।

प्रहरी प्रधान कार्यालयमा आयोजित एक समारोहमा उनले विनियोजित बजेटमा तोकिएको मापदण्ड अनुरूप कार्यक्रम सञ्चालन भए, नभएबारे प्रभावकारी तथा सुक्ष्म रूपमा अध्ययन गरी पारदर्शी प्रतिवेदन पेश गर्न निर्देशन दिएका हुन् ।

आर्थिक प्रशासन ऐन, नियम बमोजिम रितपूर्वक खर्चको लेखा दुरूस्त राखे/नराखेको लगायतका विविध आर्थिक विषयमा अनुगमन गरी प्रतिवेदन ल्याउन महानिरीक्षक सिंहले निर्देशन दिए ।

टोलीलाई स्थानीय तह निर्वाचन २०७९ मा बजेट सञ्चालन गर्ने नेपाल प्रहरीका विभिन्न कार्यालयलाई विनियोजित रकम तोकिएको मापदण्ड, प्रचलित आर्थिक प्रशासनसँग सम्बन्धित ऐन/नियम तथा प्रहरी प्रधान कार्यालयबाट समय समयमा जारी निर्देशिका र परिपत्र बमोजिम मितव्ययी, प्रभावकारी एवं पारदर्शी ढंगबाट सम्पादन भएको नभएकोबारे अनुगमन गर्ने जिम्मेवारी छ ।

यस्तै, म्यादी प्रहरी नियुक्ति तथा सुविधा, निर्वाचन शान्ति सुरक्षा कायम गर्न परिचालन अवस्थाको स्थलगत अनुगमन, पृष्ठपोषण तथा सिफारिस प्रयोजनका लागि अनुगमन टोली परिचालन गरिएको हो ।

प्रहरी प्रधान कार्यालय तथा काठमाडौँ उपत्यका प्रहरी कार्यालय सातवटै प्रदेश प्रहरी कार्यालय तथा मातहतका सबै जिल्ला प्रहरी कार्यालयमा खटिइ जान लागेका प्रहरी अधिकृतसहितका आठै टोलीले जेठ २३ गतेदेखि असार १ गतेसम्म अनुगमन गरी प्रतिवेदन पेश गर्नु पर्ने छ ।